Mongaya: Inday Nita, Serging, ug Fr. Rudy

UNSA kahay masulti nilang Inday Nita Cor­tes-Daluz, Serging Osmeña, ug Fr. Rudy Romano niining giingong iuli sa mga Marcos ang makit-ang katigayonan nga ilang kinawat panahon sa diktadurya?

Kahinumdoman, si Inday Nita usa ka brodkaster nga way kukahadlok nga mosaway sa mga kahiwi-an sa diktadurya. Gani, gihimo niyang instrument ang mikropuno alang sa pagmobilisa sa labing lapad nga mga kalihokang protesta batok sa diktador.

Siya ang inahan ni Konsehal Joey Daluz sa Syudad sa Sugbo, nga nakuyog usab kanamo kaniadto sa pagmartsa-martsa batok sa diktadurya.

Lawom pa ang kangitngit sa balaod militar dihang nitumaw kini si Inday Nita, uban kanilang Dodong Holganza ug Inteng del Rosario, sa pagpahigayon sa mga Freedom March kaniadtong 1980-81.

Gani, usa si Inday Nita ang gisikop ug gibalhog sa Camp Lapulapu tungod sa Freedom March nga gipahigayon sa Septembre 21, 1980.

Si Serging Osmeña, sa iyang bahin, usa sa mga kandidato sa oposisyon alang sa pagka sena­­dor dihang usa siya sa nabut­han og granada ug hapit siya mamatay dihadiha sa gitawag na karon nga Plaza Miranda bombing sa Septembre 21, 1971.

Kay usa man siya, lakip sa mga sakop sa iyang pamilya ang target sa dakop dihang gipahamtang ang martial law kaniadtong Septembre 21, 1972, nisibat sila padung sa Amerika. Uban kaniya ang iyang anak nga si Tomas Osmeña sa ilang exile.

Wa makaipsot dayon ang laing anak nga si Serge Osmeña ug nabalhog gyud sa stockade. Hinuon, si Serge ug iyang higala nga si Geny Lopez, tag-iya sa ABS-CBN, ang nakaeskapo gikan sa bilanggoan.

Si Fr. Rudy Romano wa pa gyud igkita, bisan iyang bukog na lang unta, human gidagit sa mga ahente sa military kaniadtong Hulyo 11, 1985 tungod sa iyang adbokasiya sa human rights.

Unsa nakong nakuyog si Fr. Romano sa usa ka lihok protesta diha sa Fuente Osmeña kaniadtong Disyembre 15, 1980 isip kasaulogan sa Human Rights Day.

Bangis nga gi-disperse ang maong kalihokan ginamit ang bombero ug anti-riot squad dayon gidakop si Fr. Romano.

Karon mobalik kita sa pangutana kon unsa kahay masulti nilang tulo – Inday Nita, Serging, ug Fr. Rudy – niining giingong iuli sa pamilyang Marcos tipik sa ilang kinawat nga katigayonan.

Kon akoy pasultihon, maka­ingon ko nga di angayang pa­salamatan ang pag-uli sa ki­nawat. Kon ordinaryong kawatan atong ipapriso man dihang mouli kintahay og kinawat nga cell phone, nganong di man ibalhog sa bilanggoan kining mga Marcos?

(@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph