LOLO namatay samtang naangol ang iyang tulo ka mga kauban human ang mini dump truck nga ilang gisakyan naligid sa 70 metros nga gilawmong pangpang niadtong Martes sa alas 3:45 sa hapon sa Barangay Cagsing, lungsud sa Ginatilan, Sugbo.
Si Alexander Lavares, 60, minyo taga Barangay Poblacion sa mao nga lungsod, job order employee sa munisipyo namatay samtang gidala padung dinhi sa dakbayan sa Sugbo.
Nangaangol sila si Rex Bitong, 46, minyo, taga Barangay Mangaco, Ginatilan, driver sa mini dump truck (SEZ-781) nga gipanag-iya sa munisipyo sa Ginatilan; Eduardo Fernandez, 40, minyo, JO, taga Barangay Poblacion; ug Damasito Polpol, 48, taga Barangay Poblacion, JO gihapon.
Si PO1 Carl Pielago, desk officer sa Ginatilan Police Station nga nahinabi sa Sun.Star Superbalita nagkanayon nga ang mga biktima magkuha unta sa mga ekipo, tolda, mga lamesa ug lingkuranan nga gigamit sa inugurasyon sa covered court sa Barangay Cagsing ingon man sa medical mission.
Si Pielago niingon nga atol sa kalihukan, gitambungan kini sa ilang mga opisyal sa lungsod ug barangay, kansang pinasidunggang dinapit mao si Gobernador Hilario Davide III.
Si Bitong nibutyag nga samtang nagtungas sila sa anopog nga karsada, kalit nga niungot ang manubela.
Tungod sa kakalit, wa na makaliko sa tuong habig ang trak hinungdan sa pagkabalitok hangtod nga naligidligid sa makadaghang mga higayon.