ANG Bureau of Fire Protection (BFP7) gusto nang mogamit sa mga bakanteng lawak sa edepisyo nga gigamit isip temporaryong Cebu City Medical Center.

Ang mga lawak giga­mit human naguba ang ka­raang edepisyo sa ospi­tal sa linog niadtong 2013.

Si Fire S/Supt. Erlinda Tobias, officer-in-charge sa BFP7, nipadala og suwat kang Dr. Gloria Duterte, pangulo sa medical services sa CCMC, aron pahibaw-on nga ila nang gamiton ang mga lawak sa ikaduhang andana.

Sa pagsuwat ning balita, wa pay nadawat nga tubag BFP 7.

Si Tobias, sa iyang suwat, nagkanayon nga gikinahanglan nang biyaan sa CCMC ang mga lawak sa labing daling panahon.

Si City Administrator Lucelle Mercado, kinsa maoy gitahasan ni Mayor Michael Rama sa pagsulbad sa isyu, nagkanayon nga wa pa sila nagkahinabi sa mga opisyal sa BFP 7 bahin sa maong katuyoan.

Ang BFP-7 ug ang City Government nag-ilog kon kinsa maoy tinuoray nga tag-iya sa luna nga gituko­ran sa regional office sa BFP.

Nitumaw ang tensyon tali sa duha ka mga habig niadtong 2013 dihang nagsingabot ang bagyong Yolanda.

Nahitabo ang face off tali nila ni Fire S/Supt. Ma. Luisa Hadjula, kanhi regio­nal director ug Raquel Bohol-Arce, pangulo sa Prevention Restoration Order Beautification Enhancement, dihang wa dayon mag­kasinabot ang duha ka habig sanglit gusto nga ga­miton sa City Hall ang luna isip temporaryong CCMC.

Gipasabot ni Tobias nga ila nang gihimo ang ilang pagsakripisyo ug sila nanghinaot nga buhaton usab sa Siyudad ang ilang bahin.

Si Mercado niingon nga sa di pa matapos ning buwana, siya makigtagbo sa mga opisyal sa BFP 7 aron hisgotan ang solusyon.