ADUNA na’y katungod ang tanang local government unit (LGU) sa Central Visayas nga mopahigayon og random drug testing sa tanang mga magtutudlo sa publiko nga tunghaan subay sa giluwatan nga memorandum order ni Department of Education (DepEd) 7 Regional Director Juliet Jeruta.

Ubos sa regional memorandum order no. 355 sa DepEd 7 nga epektibo niadtong Hunyo 19 karong tuiga nga ang tanang mga magtutudlo sa 19 ka mga school division sa rehiyon gikinahanglang mopaubos sa drug testing.

Aduna’y kapin 45,000 ka mga pampubliko nga magtutudlo ang rehiyon gikan sa 2,937 ka elementary schools ug 804 ka high schools.

Matod ni Jeruta kinsa nahinabi sa Sun.Star Superbalita kagahapon nga subay ang maong memorandum sa hangyo sa mga LGU nga makapahigayon sila og random drug test sa mga magtutudlo.

Kini human anaa’y nanggawas nga taho kabahin niining alegasyon nga dunay mga magtutudlo nga tighuyopan sa ginadiling drugas.

Lakip sa nihangyo sa DepEd 7 ang Siyudad sa Lapu-Lapu ug ang Probinsiya sa Sugbo.

Dugang ni Jeruta nga ubos usab sa Child Protection Policy sa DepEd ang iyang desisyon nga mopagawas og memorandum kabahin niini.

Gusto niya nga luwas ang tanang mga tunghaan pinaagi usab sa luwas nga magtutudlo kun Drug-Free Workplace Program.

Lakip usab kini nga mando alang sa mo-apply nga magtutudlo sa publiko nga tunghaan kon kinahanglan kini mopaubos sa drug test isip lakip sa requirements nila.

Si Jona Kie Nadera, kinsa usa sa mga magtutudlo sa Punta Princesa Night High-School, nipadayag nga uyon siya sa maong lakang ni Jeruta.

Dugang niya nga maghatag kini og dugang nga pagsalig sa iyang mga tinun-an pinaagi sa resulta sa drug test.

Base sa memorandum nga kon mapamatud-an nga magpositibo ang usa ka magtutudlo, mag-atubang kini og kasong kalapasan sa Republic Act 9165 o “Comprehensive Dangerous Act of 2002.”

Ang silot maglakip sa pagkataktak sa serbisyo.

Samtang uyon si Education Secretary, Bro. Armin Luistro,nga ipaubos sa random drug test ang mga magtutudlo sa mga pampublikong tunghaan.

Apan panawagan niya nga himuon kini sa saktong paagi aron di usab malapas ang tawhanong katungod sa mga magtutudlo.

Susihon sa DepEd kon duna bay division o mga tunghaan nga dunay suliran sa mga magtutudlo nga nagumon sa illegal nga drugas o di ba kaha mao na’y namaligya niini.

Gipaniguro ni Luistro nga di tabunan o dapigan ang mga magtutudlo ug kadtong mga non-teaching personnel nga mapamatud-ang tigamitan o tigbaligya og illegal nga drugas.

Ang Cebu Provincial Anti Drug Abuse Commission una nang nagtinguha pagpahigayon og random drug test sa mga tunghaan tungod sa nadawat nga taho nga daghan sa mga magtutudlo ang nalambigit sa illegal nga drugas.

Nilanog ang ilang panawagan nga madali kini dihang nadakpan ang labaw sa usa ka public elementary school sa lungsod sa Badian sa miaging buwan.

Gusto ni Luistro nga masunod ang guidelines nga maoy giandam sa Department of Health alang sa pagpahigayon og drug test sa mga magtutudlo.