SA UNANG higayon human sa kontrobersiyal niyang kasong rape, ang "Tawag ng Tanghalan" champion Noven Belleza nihimo og public appearance niadtong Huwebes.
Usa si Noven sa nilingaw sa mga samarang sundawo ug hospital staff atol sa 80th anniversary sa AFP Medical Center.
Sa interbyu sa ABS-CBN News, nagpasalamat ang singer sa tanang fans ug sa iyang pamilya nga maoy naghatag kuno niya og kusog aron makabangon.
"Nandiyan lang po sila sa likod ko nakasuporta. Kahit anong mangyari pala, nandiyan sila palagi sa akin," ni Noven. Dugang niya nga usa sa iyang mga nakat-onan nga dili na siya dapat mosalig dayon og tawo. Apan wala na siya mohatag og detalye tungod sa gag order.
Si Noven nihimakak sa kasong rape ug andam kuno niyang pamatud-an nga inosente siya sa korte.
Lakip sa ni-perform niadtong hapona ang mga kauban niyang grand finalists sa TNT Season 1 nga slang Marielle Montellano ug Froilan Canlas ug ang cast sa "Wildflower" nga gibituonan ni Maja Salvador.