HAPIT na gayud miabot ang lintunganay sa pagpinaabot sa katawhang Pilipino bahin sa kaugmaon sa Pilipinas sa sunod nga mga bulan. Kining mga ulahing adlaw mianam na gayud pagsaka ang duot sa katawhan nga naghagit kang Mayor Rody Duterte nga modagan pagka-presidente sa nasud.

Sa singgit sa katawhan, imong mamatikdan nga seryuso ug matinud-anon ang ilang mulo-hangyo kang Duterte nga sakyan ang anod sa iyang panaw nga gimbut-an sa Kahitas-an kun "destiny".

Ning mga ulahing mga pamahayag ni Mayor Rody medyo mikalma siya pagbalibad nga dili siya modagan, apan iyang gipahayag nga bisan pa kuno og unsaon niya pagpamalibad kon pagbuot gayud sa Kahitas-an nga mahimo siyang pangulo sa nasud sa tuig 2016 dili na gayud niya kini kapugngan.

Pero bay, kon ang survey ang atong hisgutan sanglit mianam gayud siya pagsaka, apan dili gihapon kumbinsido si Mayor Rody nga iyang basihan aron modeklarar ug modesisyon siya nga modagan. Hinuon ang survey dili garantiya nga maoy basehanan sa kadaugan sa usaka kandidato apan makatabang kini isip giya sa mga botante.

Luyo sa pagsige'g pamalibad ni Mayor Rody nga dili siya interesado sa pagka-presidente, mianam na hinuon kadaghan ang miingon nga kon himuon ang eleksiyon karon ilang botohan si Mayor Rody.

Gani sa gipagawas nga resulta sa labing ulahing survey kaniadtong Biyernes sa Pulse Asia nga gipahigayon kaniadtong Mayo 30 ngadto sa Hunyo 5 migawas nga anaa na si Mayor Rody sa solo nga ikatulo diin nakabaton og pagsaka sa porsiyentong iyang nakuha sa survey kaniadtong Marso nga 12% ngadto na sa 15%.

Sa survey nga gipahigayon sa Social Weather Station (SWS), ika-upat si Mayor Rody apan ang iyang gipangsundan nga sila Poe, Binay, ug Roxas dunay mga kausaban. Samtang si Mayor nagpabilin nga nag-anam og kataas ilabi na dinhi sa Mindanao. Ang tanang nalakip sa survey naapsan ni Mayor Rody kon Mindanao ang hisgutan.

Ako bay, nakaangay kaayo sa suporta nga gihatag sa taga Mindanao kang Duterte. Kini nagpasabot nga bisan og ang iyang silingan nakaangay kaniya. Ngil-ad kon nagpapili ka nga bisan og ang imong pamilya ug silingang tugkaran wala makaangay nimo. Di ba, kon dunay credit investigator ang silingan maoy pangutan-on nila kon angay ka bang pautangon? Ug kon imong silingan mismo moingon nga wala mi salig ana niya bay, di maaprobahan ang imong pagpangutang. Lahi imong gisulti, lahi usab ang gisulti sa imong silingan bahin nimo?

Ang dili lamang gayud makaangay kang Duterte karong panahona mao kining mga tawo nga posibleng maligsan sa iyang kabangis mao kining mga kriminal nga nagtago sa puting sapot ug nagpaka-aron-ingnong limpyo.

Nahibalo ko, bay, nga kining hangyo ug mulo sa katawhan nadunggan na ni Mayor Rody. Sayod ko nga ang matag tulo sa luha sa mga kabus ug mga nanginahanglan mibanaw ra gihapon sa tugkaran ni Mayor Rody ug maoy makakumbinse kaniya nga modagan pagpangulo, pildi man o daug.