Super Bilib: Mensahero na-abogado

NAGSUGOD sa pagka mensahero hangtod nahimo nga manlalaban ug karon nag­hu­pot og taas nga katungda­nan sa gobiyerno, ang sugi­­lanon sa kinabuhi ni Atty. Gerardo “Gerry” Mahusay.

Ang iyang sugilanon nagmatuod nga dili babag sa ka­lampusan sa pag-eskwela ang kawalay kwarta sa pamilya.

“Maninguha lang ta, makaes­kwela gyud ta,” pahayag niini.

Nahimo niya kini pinaagi sa pagkugi, determinasyon, ug pag­salig sa kaugalingon ug sa Ginuo.

Si Gerry, 62, maoy hepe karon sa Finance and Admi­nistrative Division sa Mines and Geosciences Bureau (MGB) 7 ug mao usab ang legal staff sa regional executive director sa Department of Environment and Natural Resources.

Ang iyang amahan, si Potenciano Mahusay, usa ka mag-uuma, mananagat ug retirado nga empleyado sa Bureau of Animal Industry sa Department of Agriculture, samtang, ang iyang inahan, si Desamparados del Valle-Mahusay, usa ka retirado nga maestra.

Human makatapos sa high school, si Gerry ni-standby og duha ka tuig kay way ikagasto ang iyang mga ginikanan sa pagpaeskwela niya sa kolehiyo.

Isip kamaguwangan sa u­nom ka mga magsuon, siya ang katambayayong sa iyang amahan sa pagpanagat ug pagtabang sa trabaho.

Human sa duha ka tuig, libreng nakaeskwela si Gerry sa kolehiyo sa kursong pharmacy sa University of the Visayas, siyudad sa Sugbo kay 99 percent ang iyang nakuha nga rating sa National College Entrance Examination.

Niadtong 1977, siya nakatrabaho isip mensahero sa Banco Cebuano (nahimong Bank of Cebu niadtong dekada 80). Siya ang tigdeposito sa kwarta sa ilang banko sa dagko nga mga banko, tighatod og mga report sa Bangko Sentral ng Pilipinas, tighatod og mga suwat sa ilang mga depositor ug ubang sugo.

Nahimo siya nga eskolar sa banko nga maoy nibayad sa iyang matrikula sud sa usa ka tuig ug nihatag niya og bawon nga P5 matag adlaw.

Sa maong tuig, nabayran usab niya ang iyang ba­lanse nga bayranan sa iyang gitunghaan sa high school.

Human sa usa ka tuig, si Gerry naundang og eskwela kay na-regular na sa iyang trabaho sa banko niadtong 1978.

Pagka regular, siya na-promote ug nahimo nga new accounts clerk, savings bookkeeper, loans appraiser ug real estate incharge.

Sa paglabay sa katuigan, nahimamat niya si Julita, kanhi maestra sa UV main campus. Kini ang nidasig ni Gerry nga mobalik og tungha.

Gibalanse ni Gerry ang iyang oras, sa adlawan motrabaho siya ug sa gabii ang iyang pag-eskwela.

Niadtong 1988, ni-graduate si Gerry sa UV sa kursong Commerce major in Accounting ug na-promote pagka branch manager sa usa sa mga sanga sa Banco Cebuano sa dakbayan sa Mandaue.

Pagka 1992, siya nieskwela og abogasiya sa UV ug natapos pagka 1996. Nidiretso kini og kuha og Bar examinations, apan wa kapasar.

Niadtong 1998, nasulod si Gerry sa MGB 7, apan tempo­raryo lang ang iyang appointment ug gi-renew matag tuig hangtod pagka 2004 gipa­sidan-an sila sa ilang labaw nga dili na ma-renew ang ilang appointments kon dili siya maabogado.

Tungod niini, naningkamot si Gerry ug nikuha og ba­lik og Bar exams pagka 2005.

Wa siya magtuo maka­pasar kay kuwang siya og pagpa­ngandam, lisod ang mga eksaminasyon ug nasakit pa siya sa pasulit.

“Nag-ampo ko Niya, ‘Ginuo papasara intawon ko, lisod kaayo ni og di ko kapasar unsaon na lang tiguwang nako unya nagkautang-utang na mi,’” pag-ampo ni Gerry.

Si Gerry ug Julita, court stenographer sa Mandaue Regional Trial Court Branch 56, dunay duha ka mga anak sila si Antony Alexis, 38, graduate sa Information Technology ug Marianne Audrey Mahusay-Bonjoc, 36, grad­wado sa abogasiya ug gikatakda mokuha og Bar exams sa sunod tuig.