DAW di makahulat ang oposisyon sa Syudad sa Sugbo nga mopuli na sa gituohang mabakante na nga posisyon ni Konsehal Hanz Abella.
Gikataho man gud nga ni-apply kini si Konsehal Hanz sa pagka commissioner sa National Labor Relations Commission (NLRC) ug nadawat.
Tuyo sab gyud nga dawaton ni Hanz karong giingong napirmahan na daw ang iyang appointment.
Mahibaw-an ug makita ang katag niini inig sumiter ni Hanz sa iyang resignation letter ngadto sa Konseho.
Apan nag-una-una na ang oposisyon sa paghisgot og mga posibleng moilis. Di lang gyud makahulat.
Naghinamhinam sila nga makuha pagbalik ang ilang mayoridad diha sa Konseho. Nagpangatol na ang ilang mga palad nga makababag sa mga proyekto nga iduso ni Mayor Tomas Osmeña.
Ang ako lang kay makaayo ba kaha sa Syudad sa Sugbo kon mobalik ang mayoriya sa oposisyon? Maayo ba kining giingon nila nga gridlock diin wa nay kaayuhan nga mhimo ang Konseho kay magsigi na lang sa pagbabag ang mayoriya?
Makaayo ba sab sa mga konsehal ma-administrasyon man o oposisyon kon walay agi ang tibuok Konseho? Unsay kalamposan unya sa Konseho ug ni Bise Mayor Ed Labella nga iyang makakita sa panahon sa panudya karong 2019?
Kon buot hunahunaon baya, mas dunay kalamposan nga mapakita ang usa ka konsehal kon naa siya sa administrasyon.
Hinuon, depende kana kon unsaon niya ang maong oportunidad. Pananglitan, si Konsehal Mary Ann delos Santos makapakita karon og dakong agi sa padayong pagtukod sa Cebu City Medical Center (CCMC).
Bisan unsaon pagsaway sa mga dapig kang kanhi mayor Mike Rama nga wala pa mahuman ang CCMC, di malimod nga kada agi nato sa Natalio Bacalso Highway, nagkaduol man ang kahumanan sa ma-ong edipisyo.
Di man pareho adtong panahon nga nanghambog ang kanhi mayor nga mahuman dayon ang ikaupat nga andana inig labay sa pipila ka bulan apan dihang nanghambog na siya nga nahuman kini, pulos kabilya man diay ang makita.
Mao tung naglibog ko basin naapektohan sa iyang diabetes ang mga mata sa kanhi mayor.
Bisan pa man kon mahimong mayoriya ang oposisyon, di gihapon siguro nga magpadayon kini tungod kay mga mehoras anha man maggikan sa opisina ni Mayor Tomas Osmeña.
Sa iyang bahin, makaingon kita nga naniguro na si Konsehal Hanz Abella og usa ka katungdanan nga di masamok sa politika.
Pero ambot lang sab kaha kon wa ba siya maghunahuna nga magubot ang Konseho diin unta nisuporta kaniya ang pamilyang Abella uban sa tibuok distrito sa Syudad sa Sugbo.
Ambot kon sa hunahuna sa konsehal, maniguro na lang siya sa iyaha. Bahala na ang mga tawo nga nituo unta kaniya. (@anol_cebu sa Twitter)