GISAWAY. Gisaway ug gibugalbugalan si US President Donald Trump ug si Melania, iyang asawa, atol sa ilang pagduaw sa mga biktima sa bagyo Harvey didto sa Texas tungod kay ang ilang gisul-ob wa mohaum sa higayon.
Matod pa sa taho nga si Presidente Trump nagsul-ob og jacket ug ball cap samtang si Melania nagsul-ob og taas kaayo nga sapatos, sunglasses, ug jacket nga baligya sa ilang tindahan. Ila lang sad gi-promote ang ilang baligya.
Wa masayop og sul-ob si Melania og high heels kay nagbaha man didto sa Texas. Dili sad ikahibung nga ang US first couple magsul-ob sa mahalon nga jacket nga ilang tinda kay model man si Melania kaniadto unya si Presidente Trump mora man sad og model.
Alang-alang man sad og mosul-ob og baratohon na silang duha tungod kay moadto sila sa mga biktima sa bagyo Harvey. Lisod baya usbon ang naandan na labina kay si Trump ug Melania sakop man sa alta sosyedad sa Amerika.
Dunay punto ang pagsaway sa media sa mag-asawa nga Trump sa ilang gisul-ob atol sa ilang pagbisita sa mga biktima sa bagyo nga mga residente sa Texas kay di man angayan nga ilang ipakita ang kaharohay atubangan sa mga biktima sa bagyo.
u25cf ● ●
Way pus? Nawala nag tinuoray nga kapuslanan sa Senate Blue Ribbon Committee nga moimbestigar sa mga isyu nga may labot ang katawhan ug nasud aron mopanday og balaodnon aron di masubli ang sayop sama sa pagsulod sa shabu nga balor og P6.4bilyunes.
Ang mga senador, sama ni Senate Blue Ribbon Committee chairman Dick Gordon ug Antonio Trillanes nga sakop sa komitiba, nahikalimot sa ilang trabaho.
Imbis, nga ilang ipakita ang maayong pamatasan sila na hinuon ang ehemplo sa kadautan.
Naay mga kongresista o senador (dili tanan) nga morag huwes o fiscal mangutana sa mga tawo nga giimbitar sa committee hearing nga unta kini sila mga “resource persons” ug dili sinumbong o testigos.
Tungod kay resource persons man, hatagan unta og respeto sa mga kongresista o senador atol sa hearing. Dili kay bugal-bugalan o di ba pakauwawan sa mga isyu nga way labot ang nasud.
Nahilaw ron si Senador Gordon, nga suko nga mibabag sa motion ni Senador Trillanes nga imbitahon si Davao City Vice Mayor Polong Duterte ug si Atty. Mans Carpio, nga bana ni Davao City Mayor Sarah Duterte, sa hearing kay si Presidente Duterte misugyot man gani kang Polong sa pagtambong sa senate hearing.
Nasuko si Senador Gordon kay ginganlan ni Trillanes ang Senate Blue Ribbon nga “committee de absuelto” dihang si Gordon ug Sen. Tito Sotto dili mosugot nga imbitahon si Polong ug Atty. Carpio sa Senate Blue Ribbon Committee.