MIYEMBRO sa Tau Gama Phi fraternity nga nalakip sa top 10 most wanted person sa dakbayan sa Sugbo nga dunay kasong murder nasikop didto sa dakbayan sa Iligan human magtago sud sa napulo ka tuig.
Nasikop si Dexter Romeo, 37, taga Kasambagan, Cebu City, ug sakop sa Tau Gama nga karibal nga kaaway sa grupong Alpha Kappa Rho niadtong tuig 2006 ngadto sa 2013. Si Romeo misibat sa Iligan human niya mapatay ang miyembro sa kontra nilang fraternity niadtong 2007.
Matod ni Supt. Emelie Santos, Deputy City Director for Operation sa Cebu City Police Office, dunay patung sa ulo si Romeo nga mokabat ngadto sa P135,000.
Nalutsan og warrant of arrest si Romeo nga giluwatan ni Judge Vienbenido Saniel Jr. sa kasong murder apan wala na kini makit-i kay misibat paingon sa Mindanao.
Ang Intelligence Group nakakuha ug kasayuran nga ang akusado nagtrabaho isip security guard sa usa ka bangko sa Iligan City nga maoy hinungdan nga ilang gi-serve sa warrant.
“Human ni siya makapusil 2 days after gitabangan ni siya sa iyang lolo nga molarga paingon sa Mindanao ug didto sya nanarbaho,” matod ni Supt. Emelie Santos.
Giangkon ni Romeo nga iyang napatay ang usa sa mga membro sa Akhro niadtong panahon nga init pa ang bangi sa duha ka grupo apan matod niya usa kadto ka self defense.
Siya unta ang patyon apan nailog niya ang armas sa biktima ug iya kining gipusil-patay.
Duha sa iyang mga ig-agaw nga miyembro sa Tau Gama niadtong tungora ang napatay usab sa bangi sa fraternity. Wala siya masayod nga napasakaan siya og kaso sa Cebu City.
Gani sa iyang pag apply isip gwardya wala siya mag alias sa pagtuo nga wala siya mailhi nga siya ang nagpusil sa ilang kontra sa fraternity.
“Wala man ko motago, normal ra man akong kinabuhi, naglikay lang ko sa akung sitwasyon tungod atong frat war sa pagsulod nako, nag depensa ra sad ko sa akong kaugalingon kay gisulong man ko,” matod ni Romeo.
Sa wala pa siya nadestino sa bangko gihimo siya nga escort sa armored van apan nakuha sa Maute group ang armored van atol sa gubat sa Marawi nabalhin siya sa bangko ug didto siya nasikop.
Ang Tau Gamma ug Alpha Kappa Rho pipila sa mga aktibong fraternities nga naglihok sa Sugbo, diin kanhi nalambigit sa panag-engkuwentro apan ang liderato sa duha ka grupo naningkamot nga mapatunhay ang kalinaw.
Makita ang duha ka mga grupo sa mga kalihokang sibiko sama sa pagpanglimpiyo sa palibot ug ubang lihok nga pagpakabana. (AYB)