ILIGAN City – Arestado ang usa ka pulis nga taga-Kapai, Lanao del Sur ug ang igsuon niini sa gipahigayong hot pursuit operation aron mabawi ang 17-anyos nga biktima kinsa gi-ingong ilang gikidnap.
Patay usab ang igsuon ni Police Officer 1 Alikhan Unte Unos nga si Alihatan Unte Unos, human kini makuyapan sulod sa Police Station 4 sa Barangay Tubod, Iligan City.
Si Alikhan, pulis sa Kapai Municipal Police Station, lumolupyo sa Barangay Bangun, Marawi City samtang ang iyang igsuon nga si Alihatan, residente sa 10th East Rosario Heights, Tubod, Iligan City.
Sa paghinabi sa Sun.Star Superbalita, gi-angkon ni Alikhan nga iyang igsuon si Alihatan apan gilimod sa inahan ang ilang pagkamanagsoon tungod kay manag-agaw lamang kining duha.
Alas 4:30 sa hapon niadtong Hunyo 19 dihang nakadawat og tawag ang kapulisan nga adunay batan-ong babaye nga nagpatabang tungod kay gipugos og pasakay sa duha ka mga lalaki sa Toyota Corolla.
Nasayran nga nag-jogging ang batan-ong babaye sa C3-Road sa Barangay Tipanoy dihang mi-agi ang mga suspek kinsa naka-tripping nga dagiton kini ug pahimuslan.
Miingon si Lawyer Alex T. Cabornay, hepe sa National Bureau of Investigation (NBI) – Iligan District Office (ILDO), nga deretsong mipahigayon og hot pursuit operation ang hiniusang puwersa sa NBI, Philippine National Police ug Armed Forces of the Philippines nga milangkob sa Crisis and Calamity Action Team nga gimugna atol sa pamunuan ni Acting Mayor Ruderic C. Marzo.
Matud pa ni Cabornay nga human sila mag-lock down sa tibook siyudad, deretso nila’ng gisusi ang mga iladong pension ug lodging house nga, base sa ilang intelligence report, nahimo na’ng temporaryong tago-anan sa mga kidnappers sa ilang mga bihag.
Nakit-an sa mga utoridad ang sakyanan nga adunay susama og description sa gisakyan sa duha ka mga lalaking midagit sa usa ka batan-on sulod sa usa ka lodging house sa Barangay Pala-o nga kolor pula ug adunay kombinasyon nga itom, nagdala sa plaka numero UFU-318.
Sa pagtuktok sa kapulisan sa usa sa mga kuwarto sa maong lodging house, migawas ang duha ka mga lalaki nga ang usa nakasout og upper uniform sa PNP nga adunay name tag nga UNOS ug adunay logo sa Lanao del Sur Provincial Police Office. Sa sulod sa kuwarto nakit-an ang biktima nga walay saplot, gigapos ang duha ka mga kamot og tie wire ug adunay gisampong ang mga mata ug baba gamit ang duct tape.
Deretsong gidis armahan ang mga suspek ug nakuha gikan kanila ang duha ka kalibre 45 nga pistola, pellet gun nga replica sa kalibre 45 nga pistola ug magazine alang sa maong mga armas.
Miingon si Cabornay nga lakip sa ilang imbestigasyon karon ang pagsuta kung adunay kalabutan ang managsoong Unos sa mga pagpangidnap sa dakbayan sa Iligan ilabina niadtong mga batan-ong babaye ang mga biktima.
Kini human masuta nga susamang modus lang gihimo sa mga suspek nga mao ang pagdagit sa mga babaye nga magustuhan, tago-an sa usa ka lodging house, pahimuslan una ipalukat sa pamilya sa kantidad nga 100 mil ngadto na sa 150 mil pesos.
Ingon niini, matod pa, ang nahitabo niadtong duha ka mga insidente sa pagpangidnap sa nakalabay nga bulan ug susamang paghulagway sa mga suspek ang gihatag sa mga biktima.
Miingon si Police Senior Inspector Rhyan B. Revillas, hepe sa Police Station 4, nga gitabangan og kulata sa mga sibilyan ang duha ka mga suspek pag-gawas sa lodging house dihang nahibaw-an ang gihimo nila sa biktima.
Sa pagsulat ning balita, gisuta pa sa kapulisan kung ang pagpangulata sa mga sibilyan ang hinungdan sa kamatayon ni Alihatan tungod kay gibutyag man sa pamilya niini nga aduna kini sakit sa kasing-kasing ug high blood.