NAPALGANG naghikot sa iyang liog ang usa ka lalaki nga wala nay kinabuhi Miyerkules sa buntag sa Barangay 36, Dakbayan sa Cagayan de Oro.

Ang naghikog gi-ilang si Markjay Dela Cruz, lumolupyo sa nahisgutang dapit.

Si Police Inspector Bernard Colegio, Deputy Station commander sa Police Station 2 sa Cogon mibutyag sa Sun.Star SuperBalita nga sa inisyal nga imbestigasiyon nasayran nga tungod sa depresiyon nahimo sa biktima ang maong pagpakamatay.

Gibutyag usab sa amahan sa biktima nga si Jack diin gi-ingong mibiya ang kaipon niini mga tulo na ka bulan ang milabay gumikan sa kawad-on uban sa tulo ka tuig nga anak.

Hugot ang pagtoo niini nga gidibdib sa iyang anak ang maong panghitabo hinungdan nga wala na kini gawas-gawas sulod sa duha ka adlaw ug masuko kini kon adunay moabli sa lawak.

Gitunulan na lamang, matod pa, kini sa iyang mga igsoon og pagkaon sulod sa lawak.

Gi-ingong ulahi nga nakitang buhi ang biktima niadtong Domingo sa gabii sa dihang nakig-estorya pa kini sa iyang uyoan.

Gipugos na lamang nila sa pagguba ang pultahan sa lawak nga nahimutangan sa biktima kagahapon sa dihang natan-awan kining nagtindog apan wala na naglihok.

Girespondehan usab sa Scene of the Crime Operatives (SOCO) Northern Mindanao sa pagpangulo ni Dr. West Edquilla gibutyag niini nga sa ila usab nga inisyal nga imbestigasiyon walay nakitang samad sa patay nga lawas sa biktima gawas lamang sa samad niini sa liog agi og hiniktan.

Gi-ingong gihikot sa biktima ang alambre sa iyang liog ngadto sa kesame diin posibleng maoy hinungdan sa kamatayon niini.

Hinuon sa pagsulat niini nga balita, ang kapulisan padayon pa sa ilang gihimong imbestigasyon kon wala bay foul play sa maong hitabo.