NIHANGYO ang labaw sa Commission on Human Rights sa Central Visayas sa mga opisyal sa Barangay Pajo, dakbayan sa Lapu-Lapu nga ipahunong ang pagpatuman sa shame campaign samtang han-ayon pa ang parameters aron masubay kini sa human rights standard.
Gihimo nga basehanan ni CHR 7 Regional Director Arvin Odron ang hangyo sa desisyon sa korte nga nagdeklarar nga kalapasan sa Constitution ang gibuhat ni kanhi Manila mayor ug kanhi Department of Interior and Local Government Secretary Alfredo Lim niadtong dekada 90 hangtod sa sayong bahin sa 2,000 nga susamang shame campaign batok sa mga personalidad nga gidudahang nalambigit sa illegal drugs.
Karong hapon kon way kausaban, magtagbo ang mga opisyal sa CHR, Pajo Barangay Kapitan Junard Chan ug Lapu-Lapu City Police Office alang sa usa ka dayalogo.
Si Odron mangunay og tambong sa dialogue aron mapasabot ang mga opisyal sa barangay sa posibleng kalapasan nga ilang nahimo sa pagpakauwaw sa mga durugista sa ilang barangay.
Siya nipasabot ang mga suspek hangtod dili mamatud-an nga sad-an sa korte, gikonsiderar kini nga inosente sa sumbong batok niya nga maoy nalatid sa 1987 Constitution.
“Way action nga himuon ang gobiyerno batok nila even ang convicted na dili angay pakauwawan,” pahayag ni Odron dihang nahinabi sa Superbalita Cebu kagahapon.
Siya nidugang ang CHR maoy konsensya sa gobiyerno hinungdan kanunay kini nagpahinumdum sa pagpanalipod sa katungod sa mga tawo.
“Ang primary duty sa government is to protect the rights of the people unya sila na nuon ang mo-violate,” dugang ni Odron.
Iyang nakita nga maayo ang gibuhat sa mga opisyal sa barangay Pajo aron masumpo ang pagkatap sa gidili nga drugas sa ilang hurisdiksyon, apan ang buhat nga pagpakauwaw dili makiangayon sa kampanya.
Karong adlawa nia usab sa Sugbo ang mga counterpart sa CHR sa ubang kanasuran sa Southeast Asia alang sa kalihokan sa Association of Southeast Asian Nations (ASEAN) Human Rights Institution diin nia usab dinhi ang mga commissioner sa CHR central office.
Si DILG 7 Regional Director Rene Burdeos namahayag nga maayo ang gibuhat sa Barangay Pajo sa kampanya batok sa gidili nga drugas apan mouyon kini kon unsay mamahimo nga finding sa CHR sa shame campaign nga gihimo sa hingtungdan nga barangay.