HCDC spikers midomina sa Abreeza tournament

ANG Holy Cross of Davao College (HCDC) men's ug women's team mibulsa og titulo sa bag-ohay nga 4th Abreeza Kadayawan Volleyball Invitational Tournament nga dunay 20 ka tims nagtigi gikan sa nagkadaiyang bahin sa Mindanao.

Si Calvin Sarte maoy nakasungkit sa most valuable player (MVP) award, human gipildi sa HCDC men's team 26-24, 25-23, 30-32, 25-21, 15-13, ang defending champion University of Mindanao (UM) Davao sa ilang championship match.

Ikaduha ang UM Davao samtang ang Department of Agriculture and Fisheries-Armm ug Cor Jesu College Digos City nabutang sa ikatulo ug ikaupat sa maong puwesto.

Bahin ni HCDC volleybelles, gipalukapa ang Philippine National Police (PNP) Lady Patrollers, 25-21, 25-23, 15-25, 21-25, 15-13, sa pagpaluyo ni Shiela Ochate kinsa maoy women's MVP.

Ang laing special awardees mao sila Kieth Sampinit sa HCDC (best server), Nicole John Benico sa HCDC (best setter), Andre Alderite HCDC (best blocker), Rex Paller UM Davao (best attacker) ug Virgilio Saromines sa UM Davao (best libero).

Sila Georgie Loreto sa HCDC (best server), Veronica Concenpcion sa PNP (best setter), Theresa Montalban HCDC (best blocker), Lylle Amora sa PNP (best attacker) ug Helen Antiquando sa PNP (best libero) sa babayeng dibisyon.

Si Abreeza Ayala Mall general manager Luigi Escaño ug Balibolista de Dabaw coordinator Abet Bernan ang mitunol sa P20,000, P15,000, P10,000 ug P5,000 sa upat ka tims nga nanguna sa parehong dibisyon. (Adam B. Morell)