BANSALAN, Davao del Sur -- Gihulipan na sa puwesto ang hepe sa kapulisan sa Bansalan Municipal Police Station (MPS) atol mismo sa iyang adlaw'ng natawhan kagahapong adlawa.
Mismong si Senior Superintendent Samuel Gadingan, police provincial director sa Davao del Sur, ang nanguna sa turn-over ceremony banda alas 2:00 sa hapon, Miyerkules.
Si Chief Inspector Adrian Antonio gihulipan ni Chief Insp. Jamila de Castro nga gikan sa Police Community Relations Officer sa Davao del Sur Provincial Police Office ug kanhi hepe sa lungsod sa Sta. Cruz.
Dako sab ang pasalamat ni Antonio sa iyang mga ginsakpan nga misuporta hangtud nga natapos ang iyang duha ka tuig nga termino isip hepe sa Bansalan MPS.
Pipila ka mga dagkong kalampusan sa trabaho ni Antonio mao ang gipahigayon ang One Time Big Time nga halos 30 ka tawo ang nasikop ug sagad kanila mga inilang personalidad sa lugar.
Ilawom sa iyang pamunoan, nahimong Top 3 national awardee ug Top 1 regional level isip Best Municipal Police Station ang ilang istasyonan.
Si Antonio gipasidunggan sab isip Best Junior Police Commission Officer for Admin 2017 sa Regional Level ug Best Junior Police Commission Officer for Admin 2017 isip Top 3 sa national level.
Samtang, gibutyag ni Antonio nga kabahin lamang sa ilang panerbisyo ang paghulip kaniya human natapos na ang iyang termino sa lugar ug gitakdang moadto na kini sa Camp Crame alang sa mas taas nga posisyon.
Si de Castro nipasalig nga ipadayon niya ang mga nabiyaang proyekto ni Antonio uban sa kooperasyon sa mga ginsakpan niini.
Gilayong nagbahad ang bag-ong pamuno sa kapulisan nga tinud-on gihapon ang paggukod sa mga nagpaluyo sa ilegal nga kalihukan sa lugar apil ang mga kriminal. (Orlando B. Dinoy)