KON nagtuo ka nahurot na nimo og suroy ang labing nindot nga mga atraksyon sa habagatang Sugbo, dunay pipila pa ka mga dapit ang nagpaabot madiskubrehan.
Kinsay magdahom nga sa lungsod sa Dalaguete aduna pay laing suroyanan nga segurado makadani og daghang lokal ug langyaw nga mga turista.
Kini mao ang Lugsangan Peak sa Sitio Lugsangan, bukirang barangay sa Tabon, Dalaguete.
Sa mga nakasuroy na niini, sila nakaingon nga sama kini sa Chocolate Hills sa lalawigan sa Bohol.
Sud sa pipila ka tuig, ang Lugsangan Peak wa madiskubrihi sanglit ang nahibaw-an lang sa mga tawo mao ang Osmeña Peak sa silingang barangay sa Mantalongon nga maoy gidagsaan karon sa mga turista.
Sapagkakaron, si Dalaguete Tourism Officer Victor Caruz niingon nga wa pa opisyal nga maapil ang Lugsangan Peak isip usa sa mga natural attraction sa ilang lungsod.
Gani, inig adto nimo sa lugar, libre pa ug wa kay bayran nga environmental o entrance fee.
Si Caruz namahayag nga wa pa maapil sa inventory sa Department of Tourism ang Lugsangan Peak sanglit kinahanglan pa kini i-evaluate ug i-assess sa Department of Environment and Natural Resources.
Di ikalimod ang Lugsangan Peak ang usa unya sa labing dagsaon nga dapit sa Sugbo.
Ang katahom niini naabot na sa ubang mga nasod pinaagi sa social media ug ubay-ubay na ka langyaw nga mga trekker ang nakaduaw sa lugar.
Gikan sa barangay road, magbaktas ka og 900 metros o mga 10 ngadto sa 15 minutos (mag-agad sa kapaspas sa paglakaw) sa di pa nimo maabot ang labing tumoy sa labing taas nga bungtod.
Ang dan paingon sa Lugsangan Peak di lisod, apan, kinahanglan ka mag-amping sa hait nga mga bato sa pagtungas nimo. Kon mag-uwan, dunay pipila ka bahin sa trail nga dangugon ug lapukon.
Sa imong paglakaw, duna kay malabyan nga gipangtamnan og sibuyas dahun, repolyo, carrots ug lettuce. Ang Dalaguete naila nga Vegetable Basket sa Sugbo.
Dunay parte usab nga sama sa mag rock climbing ka sa hait nga mga bato.
Kinahanglan di ka mokompiyansa kay basin ikaw ma-slide o sa paggunit niini posible masamad imong kamot tungod sa kahait sa mga bato.
Apan ang kakutas sa imong trekking kay sulit kaayo inig abot nimo sa labing tumoy nga bahin sa bungtod labi na kon makit-an na nimo ang panoramic view sa lugar.
Ang gitas-on sa peak kay moabot og 1,040 meters above sea level.
Ang uban nga makatungtong sa kinatas-an nga peak kay ma-speechless ug mahingangha sa katahom sa palibot niini.
Sa ibabaw, makita nimo ang nanaglinya nga mga bungtod. Sa amihanan, malantaw nimo ang Osmeña Peak, ang landscape sa Mantalongon Range.
Sa pikas direksyon, ang Zaragosa Island sa lungsod sa Badian samtang sa atbang malantaw usab nimo ang silingang lalawigan sa Negros Oriental.
Aron sulit ang trekking ug pagsuroy sa dapit, ipagawas ang mga camera ug cellphone ug pahimusli ang higayon nga maka-selfie ka sa katahom sa Lugsangan Peak.
Dunay mga higayon nga matabunan sa mga gabon ang mga bungtod.
Bugnaw usab ang hangin sa ibabaw tungod sa temperatura sa Dalaguete nga nailhan usab nga “Little Baguio” sa habagatang Sugbo.
Si Ananias "Aning" Apostol, 64, volunteer sa Lugsangan Peak, niingon sa summer kasagaran modagsa ang mga turista nga mobisita sa dapit.
Ang Lugsangan Peak nailhan sa uban nga Casino (Ka Sino) Peak. Matod ni Apostol nakuha ang pangan gikan kang Ka Sino, ang hamtong nga lalake nga nagpuyo sa bungtod.
Si Caruz nagkanayon nga nauyonan sa mga opisyal sa Barangay Tabon nga nganlan og Lugsangan Peak ang dapit base sa gipahigayon nga public hearing sa mga molupyo sa miaging buwan.
Unsaon pag-adto:
Gikan sa Cebu City, sakay og bus sa Cebu South Bus Terminal, P120 ang plite, tulo ka oras ang biyahe. Ang first trip kay alas 3am ug 9:30pm last trip. Ang bus mohunong sa national highway sa lungsod proper, gikan dinhi sakay og habalhabal paingon sa Sitio Lugsangan, P150 ang plite matag tawo, gibanabanang 20 kilometros ang biyahe. P40 matag tawo ang plite kon gikan sa Mantalongon Public Market, 15 mins-20 mins ang biyahe.