GIINGONG gikatakdang mahidangat sa dakbayan sa Cagayan de Oro si Presidente Rodrigo Duterte aron motambong sa MinBizCon 2017 nga gipahigayon sa kasamtangan sa Xavier Estates Sports and Country Club sugod Huwebes hangtod sa adlaw'ng Sabado ning bulan.
Gibutyag ni Police Chief Inspector Mardy Hortillosa, tigpamaba sa Cagayan de Oro City Police Office, nga hugot nga seguridad ang ilang gipatuman niining panahona labina nagkalain-laing mga delegado gikan sa laing-laing nasod ug lugar sa Pilipinas ang motambong niini.
Gilauman nga mahidangat sa adlaw'ng Sabado si Presidente Duterte apan matud ni Hortillosa nga wala pay kumpirmasyon niini ug kung aduna man dili nila mahimong idetalye og maayo hilabina kinahanglan nilang protektahan ang seguridad sa presidente.
Ang presidente sa MinBizcon 2017 ug miyembro sa Oro Chamber Inc. nga mao si Ruben Vegafria. Una na nga positibo siya nga malampuson ang dakong kalihokan ug taliwala adunay nikanselar nga mga delegado gikan sa sa Amerika apan kumpirmadong mitambong ang delegado gikan sa Europa.
Ning tuig ang tema sa dakong kalihokan mao ang “Emerging Opportunities, ONE-MINDANAO,” nga mas gipatigbabaw ang panaghiusa sa Mindanao.
Gilauman nga mokabat sa 1,000 ang mga partisipante sa event lakip ang local ug international business leaders.
Pipila sa hisgotanan sama sa Mindanao Development Corridor Updates; Fueling Mindanao Economy Through International Linkages ; Building a Disaster Resilient Economy in Mindanao, Mindanao Agri-Business: Key to positioning Mindanao in Asean and Other Emerging Markets; Mindanao Products Access and Connectivity: Challenges and Opportunities; Exploring the Potentials of Mindanao, ug Mindanao Industrial Eco- Zone Development and Opportunities.