NIKUNHOD og 51 porsento ang krimen sa dakbayan sa Lapu-Lapu sa 2016 ngadto sa tungang-tungang bahin sa 2017 itandi sa nangaging katuigan, matod ni Mayor Paz Radaza sa iyang “A Report to the Oponganon”.
Ang mga krimen naglangkob sa murder ug homicide, tulis, pagpangawat ug pagpanglungkab, rape, pagpangilad ug uban pa.
“With these records, it is clear that our police officers are serious in their efforts of maintaining the peace and order in our city,” pamahayag ni Radaza.
Matod pa sa mayor nga sigun sa kamanduan ni Presidente Rodrigo Duterte sa pagkigbatok sa kriminalidad ug illegal drugs, niabot sa dul-an 2,000 ka mga drug personality sa Lapu-Lapu ang bolontaryo nga ningtahan.
Gumikan niini, gilusad sa kagamhanan inabagan sa Department of Interior and Local Government (DILG) ang MASA MASID o “Mamayang Ayaw sa Anomalya, Mamayang Ayaw sa Illegal na Droga,” usa ka community based initiative nga ni-abag sa pag-monitor ug paghulma og mga programa nga motabang nga magmalampuson ang kampaniya.
Gipahibawo sab sa opisyal nga adunay kapin sa 20 ka mga drug surrenderer ang gi-hire sa city hall isip job order employees.
Gidestino ang maong mga JO sa material recovery facility nga naggama og channelizer nga gigamit sa mga kalsada, footpaths ug plant box samtang ang uban niabag sa coastal clean-up. (FVQ)