Land developers gihangyo mohanyag baratong balay

GIDASIG sa Pag-Ibig Fund ang mga land developers sa rehiyon nga mohanyag og mas maabot nga pabalay isip tubag sa nagkataas nga ihap sa mga miyembro sa Pag-Ibig kinsa di makapalit og balay.

Namulong atol sa press conference didto sa NCCC Mall Davao kagahapon, September 9, si Pag-Ibig Mindanao Housing Business Officer-In-Charge Mr. Cesar Bazan nagsulti nga ang land developers gidasig nga mohanyag og mas daghang pang balay kantidad og P450,000 aron nga makahatag og "equal opportunity" alang niadtong minimum lang kita.

Matud ni Bazan nga daghan sa miyembro sa Pag-Ibig sa siyudad empleyado kinsa duna lay ubos sa P16,000 binulan nga kita ug dunay ubos nga kapasidad nga makapalit og balay nga gihanyag sa mga nagkadaiyang land developers sa dakbayan, nga kasagaran nila nag-abang lang.

Dunay 97 ka accreditted housing projects sa Davao Region, sumala niya, kon diin 60 porsiyento niini nahimutang sa dakbayan.

Gitug-an ni Bazan nga ang Pag-Ibig kanunay nga naglusad og pagpakigdiskurso uban sa prospective land developing company partners aron nga hisgutan ang maong butang.

Tuod man dunay pipila ka developers, tug-an niya, nga miuyon sa hangyo sa ahensiya ug misaad nga mohatag og barato nga mga balay sa ilang sunod nga proyekto. (BSC)