MAKASAYSAYON sab kining buwan sa Septembre. Adlawng natawhan ni Don Sergio Osmeña kagahapon. Sa diktador nga si Ferdinand Marcos sab ugma.
Nahimong presidente si Don Sergio kaniadtong ikaduhang gubat sa kalibotan ug namatay siya pag 1961. Hangtod karon, gihandom gihapon sa tibuok nasud, labi na dinhi sa Sugbo, ang maayong buhat ni Don Sergio alang sa nasud.
Sa laing bahin, mahinumdoman gihapon karon ang kadaot nga nabuhat ni kanhi presidente Ferdinand Marcos sa Pilipinas labi na kadtong panahon sa diktadurya.
Kon maghisgot ta sa binilyon nga iyang kinawat, hangtod karon bisan ang iyang asawa ug mga anak wa makahibawo unsaon kini. Iuli ba bugti nga dili na lang sila gukdon o ilahon na lang gyud.
Ambot nganong di na lang dakpon ang mga Marcos karong niangkon na sila nga duna diay kinawat nga ilang giplanohang iuli.
Sunod nga makasaysayong adlaw karong buwana mao ang Septembre 21.
Septembre 21, 1971 mao ang pagbomba sa Plaza Miranda atol sa rali sa mga kandidato sa oposisyon batok kang Marcos.
Septembre 21, 1972 mao ang pagdeklarar ni Marcos sa balaod militar nga niresulta sa kapin sa dekada nga diktadurya. Lakip sa nabasura niadtong tungora mao ang atong kagawasan sa prensa.
Ato kining naangkon pagbalik dihang nahugno ang diktaruya ni Marcos pagka 1986.
Tungod niini, ginasaulog sa media sa Sugbo ang Press Freedom Week sa semana sa Septembre 21.
Mocha
Gawas sa pagduso ni Asec Mocha Uson niining mga giingong balita nga way klarong basehanan, hilig sab kini siya nga mosaway sa mga balita nga negatibo sa administrasyon nga “fake news” ug iya dayong tawgon ang mga sakop sa media nga presstitutes.
Bisan pa man og naa na siya sa kagamhanan, makapahimuot nga padayon pa siyang mo-perform uban sa iyang pundok nga Mocha Girls.
Gani, bisan pa man og gidid-an siya nga mo-perform sa casino, nipadayon gyud kini. Nisayaw pa kuno.
Sa pagkakaron, gibalita nga nakadawat og memo si Uson aron paesplikaron nganong niadto gyud siya og casino.
(@anol_cebu sa Twitter)