UNOM ka sakyanan nga giisip nga “disaster response support vehicles” ang gipalit sa kagamhanan sa dakbayan sa Mandaue nga mao unyay unang moresponde sa mga dapit nga maigo sa kalamidad.
Mokabat ngadto sa P9 milyones ang gigahin sa kagamhanan sa dakbayan alang sa maong kahimanan nga makatabang sa mga biktima sa katalagman.
Gi-deliver sa supplier ang unom ka mga truck sa City Hall niadtong Martes.
Matod ni Jessie Perez, pangu sa City Social Welfare Services (CSWS) Office, nga ang mga truck adunay kusina (mobile kitchen), generator set, mga suga, mga wire alang sa kuryente, ug tanke sa tubig nga adunay gibana-banang kapasidad nga 50 ka galon.
Sa dihang nahinabi sa mga tigbalita, si Mayor Luigi Quisumbing niingon nga buot niyang masiguro ang kaayuhan sa mga biktima sa kalamidad sama sa sunog, linog ug baha busa gipaningkamutan niini nga mapalit ang mga sakyanan.
“These will be mobile relief centers for CSWS so that during fires/flood/evacuation, we will have facilities and a well-lit center to coordinate efforts. The generator hitch can be switched out to haul rescue equipment such as chainsaws, ropes, shovels, floodlights and pickaxes among others,” matod ni Quisumbing.
Dugang niya nga ang mga sakyanan mao usay magsilbing mga “mobile command center” nga magdala di lang tubig, pagkaon ug mga tambala sa naigo sa katalagman apan motabang sab og pag-iwag sa mga ngitngit nga dapit ilabi na kon gabii.
“Ang among plano is to be able to deploy these vehicles any time when there’s a sort of calamity, immediately to the site itself. Since it comes with generator, since it comes with flood lights, even when there is no power and water on site, we would be to have, in effect, something like a ‘mobile command center’ for social welfare and relief operations,” paambit sa mayor.
Nakahuna-huna matod pa si Quisumbing niini tungod kay sagad sa mga kalamidad nga nahitabo niadto sama sa sunog matunong man og gabii ug ang supply sa kuryente ug tubig maputol. (JPP)