ANDAM mo-sponsor ang kanhi presidente ug karon kongresista nga si Gloria Macapagal-Arroyo sa balaudnon nga magtukod og food bank sa nasod.
Mao kini ang gibutyag ni Arroyo atol sa pagbisita niini sa Sugbo kagahapon isip usa sa mga dinapit sa “Rise Against Hunger,” organisasyon nga ang tumong hunongon ang kagutom sa tibuok kalibutan.
Anaa karon sa Sugbo ang pipila ka opisyal sa Rise Against Hunger alang sa labing una nga Global Strategic Planning Summit.
Matod ni Jomar Fleras, executive director sa Rise Against Hunger Philippines, nga gusto nila nga tukoron kini sa nasod aron aduna’y paingnan kadtong mga sobrang pagkaon gikan sa restaurant, hotel, ug ubang establisyemento.
Gipasabot ni Fleras nga wala’y food bank ang nasod ug angay lang nga mahimoan kini og balaod aron matukod kini isip usa ka taytayan nga makakaon ang naglisod pagpangita og pagkaon.
Dugang niini nga aduna’y pamaagi ang mga food bank nga mapahimuslan ang donasyon nga pagkaon sa nagkadaiyang establisyemento o food manufacturer aron mahatagan sa gikinahanglan.
Si Arroyo atol sa iyang keynote speech nisaysay sa nagkadaiyang mga gihimo sa iyang administrasyon aron mapaubos ang malnutrisyon sa nasod human maigo og food crisis niadtong 2006 ug ang tibuok kalibutan niadtong 2008.
Gibutyag pa niini nga dihang nilingkod siya isip presidente sa nasod, 20% sa kabataan ang dunay malnutrisyon apan dihang nibiya siya, niubos kini sa 12%.
Sa Sugbo, usa ning SimplyShare Foundation Inc., nga partner sa Rise Against Hunger diin nagpakaon kini og mga tinun-ang bata nga undernourished.
Usa sa proyekto ug padayon nilang gihimo nga feeding kining sa Brgy. Baring sa lungsod sa Carmen.
Matod sa executive director niini nga si Pamela Baricuatro nga 150 ka bata ilang natala nga malnourished sa maong barangay diin mao kini ilang gipakaon aron mahatagan kini og igong nutrisyon.
Ang presidente ug CEO sa Rise Against Hunger nga si Rod Brooks nagkanayon nga unom ngadto sa 10 ka buwan ang gikinahanglan nga feeding alang sa mga bata nga malnourished.
Kalima ka higayon usab sila gikinahanglan nga pakan-on sa matag semana base ma usab sa ilang gihimo.
Gawas sa food bank, nitanyag usab si Arroyo sa Rise Against Hunger nga makigtambayayong una sa National Nutrition Council karon nga wala pa’y Zero Hunger Commission ang nasod.