NAKUGANG karon ang nasud tungod sa pinatyanay sa kaulohan. Mas nakapasamot sa kakugang mao ang pagkalambigit sa mga bata ug batan-on nga nabiktima sa gitawag nga extrajudicial killings (EJK).
Sa niaging mga semana, gilubong si Kian nga kanhi estudyante sa University of the Philippines, sunod si Carlo nga nang-hold-up kuno og taxi. Karong bag-o, nakit-an ang patay'ng lawas ni Reynaldo, 14 anyos nga kauban kuno ni Carlo sa pagpang-hold-up.
Nakit-an ang iyang patay'ng lawas nga gilabay sa usa ka creek sa hilit nga lugar. May piring nga tape ang iyang nawong, adunay 30 ka dinuslakan ug samad sa kutsilyo ug nanimaho pang gasolina, pasabot nga gusto siyang silaban sa mga mamumuno.
Mga mangilngig nga krimen nga ang gikatahapang suspetsado kay mga bungutong sakop sa Philippine National Police (PNP).
Lami ihilak kauban sa mga ginikanan ug kabanay sa mga bata nga napagan sa giyera sa druga sa nasud. Wa man kita niingon nga sayop ang giyera kontra druga sa pamunuang Duterte apan unta dili ingon niini ang panghitabo nga sobra 8,000 na ang namatay, apil niini ang mga batang inosente.
Bisan pa man kung ingon nato nga hold-upper sila ni Carlo ig Reynaldo, walay bisan kinsang awtoridad nga mokutlo sa ilang kinabuhi.
Ibutang nato nga nisukol sila, butilo na ba gyud ang atong kapulisan nga dili makaigo sa tiil o sampot man lang sa ilang target?
Dunay tigpaniid nga nisulti nga tungod kini kay sa PNP Academy ug sa Philippine Military Academy gitun-an sila unsaon pag-igo sa lawas sa kontra.
Anaa nahimutang sa lawas ang kasingkasing sa tawo busa "fatal" o makamatay gayud ang ilang tirada ilabi na nga kuyaw na karon ang ilang armas.
Apan dili lang karon nahitabo nga anaay mga bata nga gitirahan. Bisan dinhi sa Davao nahitabo ang pagpamatay sa mga bata bisan snatcher o sakop sa gang.
Kung wa ko masayop sa datos nga gikan sa United Nations Children's Fund (Unicef), usa (1) sa matag siyam (9) sa mga namatay ala-EJK kay bata.
Kahibalo ako nga walay sugo ang atong pangulo ug si PNP Chief Ronald "Bato" dela Rosa nga patyon ang inosente ug bata apan nahimo nang sistema sa pipila nga anaa sa puwesto, ilabi na sa mga bag-ong recruit nga i-shortcut ang ilang trabaho.
Tiaw mong mga Police Officer 1-3 kanunay ang gibalita nga nitira sa mga bata? Buot ipasabot, mga bag-ong pulis kini nga sa gabas pa, kulang og lingig nga bisan mali, gustong mo-score aron motaas ang ranggo ug malipay ang ilang hepe.
Nindot man unta ang kurikulom sa PNP nga moapil sila sa community service ug mga seminar sa tawhanong katungod ug espirituwalidad.
Diha sa PNP Regional Training Center sa Mintal, kanunay nga mo-lecture sa mga kadete ang Brotherhood of Christian Businessmen and Professionals ug ubang relihiyusong grupo.
Una sila mograduwar, kinahanglang mopapirma sila og "clearance" sa usa ka civil society organization o non-government organization nga nakaila kanila.
Kinahanglang repasuhon pag-usab sa training sa PNP. Sayang ang kinabuhi sa bata nga napagan sa giyera sa hamtong.