USA na sab ka chess tournament nakalinya sa mga kabatan-onan karong panahon sa bakasyon.
Kini, human gianunsyo sa hugpong nga mga chess trainers ang 1st Max “Jon-Jon” Rodriguez Summer Chess Kiddies Tournament diin ipahigayon ugma didto sa Barangay Nazareth Gymnasium.
Abli kini sa duha ka kategoriya nga mao ang category one alang sa grade one paingon sa three ug category two alang sa grade four paingon six.
“This is one way of letting the children enjoy summer through sports,” matod ni tournament arbiter Joseph “Jokorn” Maestrado, kinsa naila nga karaang pambato sa Nazareth sa dulang chess.
Parehas ra ang premyo sa mga mananaog sa duha ka kategoriya.
Ang kampyon mouli og P1,000 cash prize ug trophy, samtang ang second ug third place mobitbit sa P600 ug P400 ug trophies, sunod-sunod.
Ang fourth placer moangkon og P200 ug trophy, samtang ang ika-lima paingon sa ika-napulo mouli og P100 ug medalya matag usa.
Aduna sab top-Nazareth diin ang pinaka top performer mouli og P300 ug medalya, samtang P200 ug P100 ug medalya matag usa alang sa second ug third top performer sa maong barangay.
Naay registration apan libre kini sa tanan lumolopyo sa Nazareth.