BUGTONG si Lapu-Lapu City Councilor Harry Radaza nga gikan sa Visayas area nga usa sa pito sa gipasidunggan sa Superbrands Marketing International (SMI) isip Outstanding Local Legislator lukop nasod.
Nahinangop si Radaza sa maong award diin ang iyang nahimo ug paningkamot ilabi na sa natad sa Sports Tourism milanog ug naabot sa pandungog sa SMI.
Mapasalamaton sab ang opisyal ngadto ni Mayor Paz Radaza nga mipaluyo o misuporta sa iyang mga programa nga misalig sa iyang katakus.
“In the Philippines, only seven out of the thousands of councilors are recognized and to be one of them chosen only makes me work harder for the benefit of the Oponganons,” tipik sa pamahayag ni Konsehal Radaza.
Ang batan-ong Radaza maoy responsable sa pagdala sa international sporting event sa Lapu-Lapu sama sa international tennis tournament Davis Cup, Ironman 70.3 triathlon nga sud na sa unom ka tuig nga gipahigayon sa dakbayan.
Ang SMI usa ka worldwide multi-national publication diin sa matag tuig mohatag og pasidungog ang SMI niadtong takus nga government officials, kompanya, ug brands nga nahimong malampuson sa ilang posisyon o milambo sa tinguha nga naghatag og kaayuhan sa kinabag-an.
Sud sa 18 ka tuig ang maong organisasyon mipasidungog na ngadto sa 14,000 ka mga opisyal, kompaniya, ug brands sa 90 ka mga nasod lakip na niini ang siyam ka mga nasod sa Southeast Asia.
Nasuta nga mopahigayon ang SMI og assessment ngadto sa mga awardee (candidates) pinaagi sa pag-research sa ilang nahimong proyekto o programa ug sutaon sab kon unsay actual impact niini ngadto sa ilang komunidad.
Ang awarding gipahigayon sa Alpha Land Hotel sa Makati City, Manila niadtong Miyerkules. (FVQ)