LAIN na pod ning higayon nga morag mga iring gilaygit ang mga mahiligon sa mga artista. Seguradong syagit to da maks na pod ni sila inig tungtong ni Piolo Pascual sa entablado sa SM City Cebu.
Katapusan nakong tsika ni Piolo adto pang Sinulog sa 2014. Dugay na. Moanhi si Papa P karong Lunes aron imbitahon ang mga makisine nga motan-aw sa unang panagpares nila ni Sarah Geronimo sa pelikulang The Breakup Playlist.
Ang nakaparat lang kay di makaanhi si Sarah tungod sa tapings sa The Voice. Paet! Ambot kon nadayon ba ang gipagarpar sa una nga kissing scene sa duha dinhi sa pelikula.
Naku ha! Umeegat na talaga si Ate Sarah. Haha! Ana. Ang buot ipasabot niana nga ni-usbaw ang pagkaartista sa Pop Princess. Isalida na ang The Breakup Playlist karong Miyerkules, Hulyo 1.
***
Gawas sa maihap nga higayon nga kontrabida ang gidala ni Susan Roces, kasagaran gyud nga buotan, tarong ug sulundong babaye ang iyang papel.
Morag ingon sab tingali ani si Susan sa tinuod nga kinabuhi. Kining mga taho nga nag-una sa mga survey sa mga pili-onon pagka presidente ang iyang anak nga si Sen. Grace Poe, namahayag si Susan nga iyang gihatag kang Sen. Grace ang kahigayonan sa paghukom sa iyang kapalaran.
Igo ra kuno siyang mohatag og tambag kon pangayo-an. Pagka nindot nga inahan.
***
Samtang pwerteng bandera sa mga anak sa ilang mga pagtimbaya ug paghatag og dungog sa ilang mga amahan niadtong Dominggo sa pagsaulog sa Fathers Day, niay hungihong nga ipadayon gyud ni Julia Barreto ang pagpatangtang sa apelyidong Baldivia nga iya sa tinuod niyang amahan nga si Dennis Padilla.
Sa ato pa, wa diay maleksyon si Julia nga giingong nihinay ang dagan sa iyang pag-artista niadtong nibuto ang balita nga di na siya gustong modala sa apelyido sa iyang amahan niadtong wa pa nagkabalik ang ilang maayong kabubut-on.
Atong tan-awon kon modapig pa gihapon ni Julia ang iyang mga magdadayeg kon ipadayon gyud niya ang iyang plano. Kana, kon tinuod man.
***
Medyo naguol ko sa hungihong nga ilisan ang Sunday All Stars sa GMA 7. Ngano? Gipatambong baya gyud ang E-Group sa paglunsad sa maong programa.
Didto gyud mi sulod sa studio atol sa unang pagpasundayag niini. Hinoon, kon morag way klarong padulngan ang maong show, wa tingali rason nga ipadayon pa kini.
Manghinaut lang ko nga mas bongga ug suportahan sa mga tumatan-aw ang ipuli sa Sunday All Stars. Ug… hinaut patan-awon na sab mi didto. Di gyud dautan! Haha!
***
Uy! Bonggang kalihukan diay ang mahitabo sa Liv Super Club karong gabii. Kini mao ang Michel’s Wine Night nga maglunsad sa mga bino nga gikompra gyud ni Senyorito Michel Lhuillier gikan sa nasud sa France, Italy, Spain ug uban pa.
Si Aida Patana ang gitahasan paghimong alegre sa maong kalihukan. Mao nga mopasundayag ang The Power Trio, si Jennifer Lee, Daniel Matsunaga, Ethel Booba, Jeric Raval, Selina Sevilla, Ms. Mandaue 2015 Ana Velasco ug ang M. Talent Models ug Marlon Wafer Models nga magsul-ob sa mga collection ni Maria Elena.
Finale sila si Senyorito Michel ug Senyorita Amparito nga magsul-ob sa creation sa ilang sikat kaayong anak nga designer sa USA nga si Monique. Balitaan ta mog usab bahin ani. Pramis.