DUGAY na nga nagpakahilom si Bise Presidente Jejomar Binay sa pagtratar kaniya isip usa ka punching bag sa mga alyado ni Presidente Noynoy Aquino. Matod pa niya, gikapuyan na siya nga himuong punching bag mao nga miluwat siya sa Gabinete ni PNoy. Karon nga di na siya sakop sa Gabinete, gawasnon na siya nga mobawos sa moatake kaniya.

Apan unsay iyang unang atake? Matod pa ni Binay, ang administrasyon ni PNoy “manhid at palpak.” Ang manhid sa Tinagalog, sa Binisaya, walay pagbati. Ang palpak di na kina­hanglan nga hubaron pa kay masabot na man nato. Palpak gani, wa molampos, di ba?

 Karon, ang tibuok administrasyon maoy nay gilampornas ni Binay. Pero mas maayo nga diha pa siya motingog sa dihang di na siya sakop sa Gabinete ni PNoy. Kon iya pa kanang gibuhat kaniadto, dugay na siyang gitaktak sa Gabinete.

***

Ang Inquirer nagtaho subay sa usa ka tinubdan nga wa ibutyag ang pangan nga vicious ug unethical ang atake ni Binay batok sa administrasyon. Samtang si Presidential Spokesman Edwin Lacierda niingon nga nganong karon lang motingog si Binay nahimo man untang diskutihon kini uban ni PNoy samtang diha pa siya sa Gabinete.

Tingali kon nagpundo lang og hangin si Binay niadtong panahona. Sama sa boksidor nga mosandig sa pisi ug magpasumbag lang kay nagpundog hangin. Pero niabot na tingali ang panahon nga wa na siya kaagwanta nga himuong punching bag.

Dunay giingon nga way sukod sa bawos. Karon, human sa dugay nga pag-agwanta, iya na sab ang panahon sa pagbawos. Ingon pas taga Cabadia­ngan, mobawos man gani nang binugha.

***

Gitudlo ni PNoy si Binay nga housing czar ug presidential adviser alang sa mga migrant workers kon sa minilyon nga mga overseas Filipino workers (OFW). Mao kana nga di kahibudngan kaniadto nga kon dunay usa ka OFW nga bitayunon, si Binay maoy molarga dayon sa pagsuway sa pagluwas sa maong OFW.

Si PNoy niingon nga gitudlo niya si Binay nga sakop sa Gabinete aron maluwas si Binay sa iyang papel isip usa ka “spare tire” nga mag­huwat lang kon simbako magluya o kaha mamatay ang presidente.

Di na siya spare tire apan gihimo man sab nga punching bag sa mga alyado sa administrasyon. Kay kon spare tire pa lang siya, dugay na tingali siyang gipahiyosan.

***

Gibutyag ni Binay nga dunay laraw ang administrasyon nga ipapriso siya sa di pa ang piniliay sa 2016. Di man tingali ni niya angay nga kahadlokan. Si Senador Antonio Trillanes IV bitaw nidaog man sa pagkasenador bisan kon gipriso siya.