Mongaya: P62 milyones boardwalk sa Naga

GI-INAGURAR na ang P62 milyones nga boardwalk didto sa Syudad sa Naga sa usa ka se­remonyas nga gipangulohan ni Mayor Kristine Chiong.

Usa kini sa mga damgo sa iyang amahan, si kanhi Mayor Val Chiong, mga 10 ka tuig nga milabay dihang iyang gimugna ang iyang programa alang sa kalambo-an nga gitawag og Vision and Leadership (VAL) 2020.

Natukod kini tungod sa ta­bang ug suporta ni Kong. Sam­sam Gullas, matod pa ni Chiong, dihang atong nahinabi ang duha atol sa soft opening sa miaging semana isip usa sa mga kalihokan sa ika-10 nga Charter Day sa syudad.

Kay kita man ang natahasan pipila na ka tuig nga milabay isip tigsulat sa kasaysayan sa Syudad sa Naga ubos sa usa ka programa sa lalawigan sa Sugbo nga gidumala sa Cebuano Studies Center sa University of San Carlos, nakasubay kita ni­ining pagtubo sa maong syudad.

Ug, tungod kay iyang na­buhat ang mga proyekto ubos sa maong programa, mapasigarbuhon kitang mosulat nga ang Syudad sa Naga maoy labing progresibo nga local government unit sa tibuok rehiyon.

Akong masulti nga kining vision ni Chiong ug ang iyang abilidad sa pagpahuman dayon og mga proyekto bisan pa og limitado ang iyang pundo maoy usa sa mahinungdanong hinungdan sa maong kalambuan sa syudad.

Kining mga fancy lamppost pananglit nga nagsuga sa plaza Naga pananglit. Wala kini makuwestyon nga overpriced kay barato man sab gyud ang iyang pagpalit niini.

Lahi ra sa nahitabo sa Syudad sa Mandaue ug Lapu-Lapu pipila ka tuig nga milabay.

Dugang pa, wala say seryusong kontrobersiya sa liderato diha sa Syudad sa Naga. Nagpadayon ang malambuong liderato nilang Val Chiong sa syudad ug Edigul sa distrito ngadto sa sunod henerasyon – silang Kristine ug si Samsam.

Hinaot masulbad na kining mga politikanhong kontro­bersiya sa Syudad sa Sugbo aron sab makatagamtam na kita og dugang dayon paspas nga kalamboan sama sa Naga.

Trillanes

Gusto si Sen. Sonny Trilla­nes nga matuohan ang iyang mga alegasyon batok ni Pre­sidente Rodrigo Roa Duterte, ang anak niini nga si Bise Mayor Paulo Duterte sa Syudad sa Davao, ug kang Mans Carpio, ang bana ni Mayor Sara Duterte.

Apan kataw-anan iyang pag-apil kang Director Ahmed Cuizon sa LTFRB 7.

Matod ni Trillanes dihang gi-interview ni Leo Lastimosa sa dyAB, nalambigit kini si Cuizon sa pagkilkil sa Uber. Apan, dihang nag-closed-door meeting ang mga sakop sa Uber ug si LTFRB chairman Martin Delgra, walay ingon niini nga reklamo nga nitumaw.

Moguwa nga motuo lang diay si Trillanes ug bisan unsang basura nga mahimong malabay batok sa pamilyang Duterte. (@anol_cebu sa Twitter)