SUKAD niadtong Sangguniang Kabataan chairman pa siya handtod karon nga konsehal na siya sa Barangay Sawang Calero, padayon ang adbokasiya ni Kenny Glenn Silud sa pagrotehir sa kadagatan.
Ang 24-anyos nga si Kenny mao ang nagpasiugda sa My Little Seahouse, usa ka mini library nga iyang gi-set up sa barangay hall diin aduna’y kahigayonan ang mga bata nga nagpangedaron og 6-10 anyos nga mahibawo kabahin sa mga hayop ug organismo nga nagpuyo ilawom sa dagat.
Usa ning My Little Seahouse sa 19 ka mga marine conservation projects sa mga batan-ong Pinoy nga gipundohan sa United States Embassy.
Namugna ang maong proyekto human sa Sea Camp, usa ka summer camp nga giorganisar sa Save the Philippine Seas, usa ka grupo nga nagdasig usab sa marine conservation, sa Coron, Palawan niadtong 2015.
Gawas sa iyang adbokasiya, aktibo usab si Kenny, usa ka civil engineer, sa protesta batok sa proposed coal-fired power plant sa maong barangay, kay nagtuo siya nga risgo ug delikado sa tawo ug kalikopan.
Tungod sa iyang passion sa pagtabang sa pagprotehir sa kadagatan, mao usab kini ang nagdala kaniya sa isla sa Malapascua, lungsod sa Daanbantayan, diin usa siya ka volunteer isip conservation management field worker.
Nitabang siya pag-edukar sa komunidad sa dapit kon unsaon nila pagprotehir sa marine protected areas ingon man sa mga Thresher sharks sa dapit.
Sa pagkakaron, anaa si Kenny sa Estados Unidos isip nag-inusarang Sugboanon nga lakip sa 17 ka mga batan-ong Pinoy nga napili alang sa Young Southeast Asian Leaders Initiative Academic Fellowship 2017, nga pinundohan usab sa gobyerno sa US.
Bisitahon nila ang nagkadaiyang unibersidad sa US aron mas palapdan pa ang ilang kaalam kabahin sa civic engagement, social entrepreneurship ug alang sa kalikopan. Usa kini ka buwan nga fellowship.
“This opportunity is a stepping stone for me to level up my advocacy work. With this, I might be able to address the local environmental issues more effectively and come up with more efficient solutions. For example, with my new work in Malapascua where we need to come up with a management plan for the marine protected areas and the protection of the thresher sharks, hopefully after the fellowship, I will be able to come up with efficient strategies in legislative work and community ground work,” matod ni Kenny.
Malaumon siya nga makatampo sa mga diskusyon sa iyang pagtuon sa Estados Unidos ingon man mapaambit niya iyang adbokasiya.
“Who knows, they might be able to learn a lesson or two from my experiences and they might just be able to apply it in their individual advocacies”.