MASAYRAN na karong gabii kung kinsa ang mohari tali ni kanhi International Boxing Organization (IBO) world superflyweight Edrin Dapudong (30-6-19 win-loss-KO) ug kanhi Pan Asia Boxing Association (PABA) flyweight Richard Garcia (25-21-1) sa For the Gift of Education Boxing Revolution III "No guts No glory" didto sa Davao City Recreation Center, kanhi Alemendras Gym.

Mitimbang si Dapudong og 118 pounds samtang si Garcia mibug-at og 121 lbs. atol sa official weigh in kagahapon didto sa NCCC Mall Activity Center.

Tungod niini, nasabutan sa duha ka kampo sa mga boksidor ug giuyonan sa Games and Amusements Board Davao Sports (GAB) ug games officer John Kenneth Improso nga mogamit og gloves nga 10 ounce si Garcia inay 8 ounce.

"Nasabutan nga maggamit na lang si Garcia og 10 ounce gloves, di na 8 ounce aron di na siya magkunhod og timbang," sulti ni Richard Reyes, Sonshine Sports management (SSM) gikan kang Coach Bruce Lerio atol sa pakighinabi kaniya sa telepon kagahapon sa hapon.

Samtang sulti ni Garcia nga himuon niya ang tanan aron modaug apan giangkon niya nga lisud sab nga kalaban si Dapudong.

"Mahirap siya kalabanin kasi beterano. Gagawin ko lang ang dapat gawin," ni Garcia atol sa press conference kagahapon.

Sa bahin ni Dapudong, "Maningkamot ko nga modaug ugma."

Gibutyag sab ni SSM sports executive officer Manny Pinol, "This is critical fights kang Dapudong dapat modaug siya nga convincing aron makaaway siya sa gina-negosasyon bakanteng IBO Bantamweight world title."