GILUSAD sa Integrated Bar of the Philippines (IBP) Cebu Chapter ang ilang Jail Decongestion Program sa Mandaue City Jail.
Kini nunot sa kasabutan nga ilang gihimo tali sa Bureau of Jail Management and Penology ug sa Humanitarian Legal Assistance Foundantion alang sa paghatag ug paralegal services sa mga piniriso.
Matod sa pangulo sa IBP Cebu Chapter, Atty. Gonzalo Malig-on Jr., gipili nila ang Mandaue City Jail tungod kay sila man ang dunay labing daghan ug mga piniriso sa tibuok Visayas.
Sobra na sa 1000% ang gidaghananon sa mga piniriso sa maong pasilidad kun itandi sa orihinaha nga kapasidad sa prisuhan.
Ang IBP Cebu Chapter magpadala ug 10 ka mga abogado ug 30 ka mga tinun-an sa Law school aron maoy motabang sa mga inmate pag-follow up sa ilang mga kaso, ilabi na kadtong wa na maglihok.
Ang gihimo sa IBP Cebu Chapter pagpakig-alayon sa BJMP ug usa ka non-government agency maoy labing una sa Sugbo.
Nanghinaot si Malig-on nga sundon kini sa ubang grupo aron usab katabangan kadtong mga piniriso, kansang kaso natanggong na diha sa korte.
Nagtinguha usab si Malig-on nga magmalungtaron ang mao nilang programa ug hingpit na unya sila nga makabutang ug mga volunteer ug mga abogado nga maoy moatiman sa 100 ka mga kaso nga ilang mapilian sulod sa usa ka tuig.
Gikalipay sa mga inmate ang paralegal service nga gihatag sa IBP, BJMP ug HLAF ngadto nila.
Nanghinaot ang mga piniriso nga pinaagi sa ilang serbisyo mapaspasan na ang pagresulbar sa mga kasong ilang giatubang.
Dunay 40 ka inmates ang inisyal nga naatiman sa paralegal team sa ilang pagbisita sa Mandaue City Jail. Naglaom ang jail warden nga si Chief Insp. Gil Inopia nga ma-decongest ang ilang prisuhan tungod sa kadaghan sa ilang mga piniriso.