KONSEHO sa dakbayan sa Talisay gustong ipasusi og balik sa memorandum of agreement MOA)nga gipirmahan niadtong Agusto 2, 1994 tali sa kagamhanan sa Talisay ug Metropolitan Cebu Water District (MCWD).

Una niini, ang kadagkuan sa MCWD nitunga sa sisyon sa konseho aron mohangyo nga hatagan sila og pagtugot nga maka-operate ang laing upat nila ka mga bomba sa tubig nga nahimutang sa Jaclupan.

Human usab ang National Water Resour­ces Board nangayo sa MCWD og resolusyon gikan sa konseho nga nagtugot nga maka-operate ang lain nilang upat ka bomba sa tubig.

Gumikan niini, na­ban­haw pagbalik ang isyu labot sa bayranan sa MCWD sa siyudad.

Alang sa konseho, alkanse ang Talisay tungod kay barato ra ang ilang bayad.

Si Konsehal Aldin Diaz niingon nga maayong ma-review aron masuta kon makatarunganon ba ang ilang bayad ngadto sa Talisay.

Gihulagway ni Diaz nga dugay na kaayo ang maong kabotan ug labing siguro nga barato pa ang ilang bayad sa matag cubic sa tubig nga ilang makuha.

Ang pamahayag ni Diaz gipaluyohan usab sa sa konseho nga gipangulohan ni Bise Mayor Romeo Villarante.

Matod ni Villarante, ang ubang lugar nakapahimulos sa tubig sa Talisay, apan ang mga bukirang barangay sa Talisay wala gayod makapahimulos niini.

Si Mayor Johnny delos Reyes mi­uyon usab sa maong plano ug nidason nga maayong tan-awon ang MOA ug mausab kini sa labing dali aron makakuha usab ang Talisay sa insaktong bayad sa tubig nga gikuha sa Jaclupan  ug ibaligya sa MCWD ngadto sa laing lugar.

Ang moa gipirmahan sa Talisay ug MCWD   panahon ni kanhi Mayor Dehlia Tiu sa dihang lungsod pa ang Talisay ug ni Alfonso Albano nga chairman sa Board of Directors sa MCWD niadtong gihayona.

Ang MCWD a­­­du­nay 19 na ka pumping stations.