HAYAN sa sunod semana ma­dawat na sa mga opisyal ug empleyado sa Kapitolyo ang ilang productivity enhancement incentive o ang usa ka buwan nga sweldo.

Ang Sangguniang Panlalawigan sa Sugbo atol sa special session kagahapon sa buntag nipalabang sa P32,599,000 nga Supplemental Budget No. 3 diin gipasukip ang gahin alang sa ihatag nga PEI sa mga kawani sa Kapitolyo.

Si Provincial Board Member Peter John Calderon, chairman sa committee on education, ang nangamahan sa ordinansa alang sa pagpalabang sa supplemental budget nga giaprobahan sa iyang mga kaubang bokal.

Si Provincial Budget Officer Danilo Rodas niingon ang gahin kuhaon sa savings gikan sa Personnel Services sa mga bakanteng puwesto sa nagkadaiyang departamento sa Kapitolyo nga wa pa magamit sama sa Cebu South Bus Terminal ug provincial ug district hospitals.

Matod niya moabot sa 600 ka vacant positions ang napundohan na apan wa pa malingkuri og kawani hinungdan nga adunay savings ug nitubo ang panudlanan sa lalawigan.

Kon mapirmahan na ni Gobernador Hilario Davide III ang ordinansahon, himoan dayon nila ni Rodas og payroll ug iduso ngadto sa buhatan sa Accounting.