GITINGUHANG usbawan ang financial assistance sa mga senior citizen sa dakbayan sa Mandaue og P2,000 pinaagi sa re­solusyon nga giaprobahan sa konseho niadtong Miyerkules.

Mahimo na unya kining P5,000 gikan sa P3,000.

Personal nga giduso ni Konsehal Emmarie “Lolypop” Ouano-Dizon ang resolusyon nga mihangyo kang Mayor Jonas Cortes nga usbawan ang financial assistance sa mga senior citizen sa dakbayan.

Nasuta sa Sun.Star SuperBalita nga ang maong tahas usa lamang ka floor  resolution ug wa kini malakip sa agenda sa konseho sa milabayng sisyon tungod kay nadawat ni Ouano- Dizon ang suwat gikan sa pederasyon sa mga senior citizen niadto pang Martes.

Matod ni Ouano- Dizon nga misuwat kaniya ang pundok sa mga senior mahitungod sa maong tahas ug mihangyo nga usbawan ang ilang madawat nga tabang-pinansyal.

“The mounting expenses for medicines and other medical concerns of the senior citizens as their age advances make their monthly pensions, if any, hardly sufficient for the needs,” ni Ouano- Dizon sa iyang draft ordinance.

“I have received a letter dated June 22, 2015 from the Barangay Chapter Presidents of the Senior Citizens of Mandaue City requesting me to represent them requesting the City Government of Mandaue for an increase in the financial aid,” dugang niya sa dihang nahinabi sa Sun.Star SuperBalita.

Sa iyang resolusyon, kaduha ihatag ang maong financial assistance sa mga senior nga matumong sa buwan sa Hunyo ug Disyembre.

Sa pagkakaron, bugtong pag-uyon nalang ni Mayor Cortes ang gihuwat aron mapatuman ang maong resolusyon.