MIKABAT na ngadto sa halos P50 milyones ang balor sa gidili nga druga nga nasakmit sa mga sakop sa Cebu Provincial Police Office gikan sa Enero hangtod sa Hunyo ning tuiga.
Sa accomplishment report nga gipresentar ni Supt. Rodolfo Albotra, hepe sa Provincial Intelligence Branch sa CPPO, siya nipahibawo nga gikan sa Enero hangtod sa Hunyo 19, 2015, niabot na og 525 ka mga operasyon ang napahigayon sa CPPO sa una ug ikaduhang quarter ning tuiga diin 745 na ka mga tawo ang nadakpan ug 989 na ka mga kaso ang napasaka.
Sa mga operasyon, 3.842 ka kilo na sa shabu ang nasakmit nga base sa Dangerous Drugs Board nga value moabot na og P46,042,352.
Dugang sa presentasyon, sa unang quarter sa 2015, mas daghan ang nasikop sa mga pulis nga niabot og 278 ka tawo kon itandi sa 247 sa ikaduhang quarter.
Apan, mas dako ang nasakmit nga drugas sa ikaduhang quarter nga nikabat og kapin sa 3.4 ka kilo kon itandi sa 417.32 gramos sa unang quarter.
Apil sa dakong kalampusan nila sa kampanya mao ang pagkasikop nila ni Joel Sumabong, giila nga lider sa Sumabong Ancero criminal gang niadtong Enero 24, 2015 sa operasyon sa Brgy. Malingin, Bogo City nga nakuhaan og P649mil nga kantidad sa shabu, mga armas ug granada; Maribel Ibo Arcenal ug Eduardo Batad Arcenal nga nadakpan niadtong Mayo 2, 2015 sa Brgy. Poblacion, San Remigio diin nasakmit ang duha ka kilo ug 25 gramos nga shabu ug usa ka Mitsubishi Estrada; ug Jason Tabla niadtong Mayo 27, 2015 sa Brgy. Poblacion Danao City diin 65 gramos nga shabu ang nasakmit.
Si Albotra niingon ang malampusong operasyon resulta sa pagtinabangay sa kapulisan, provincial government ug komunidad.
Si CPPO Director Noel Gillamac nagkanayon nga epektibo ang programa sa Cebu Provincial Anti-Drug Abuse Council nga “Limpyo Probinsya” sa pagsumpo sa pagkatap sa illegal drugs sa lalawigan.
Niadtong Mayo 26 hangtod Hunyo 2, 2015 lang, nikabat na og P 12,095,502 ang balor sa gidili nga drugas nga nasakmit nga niabot og 1,025.12 gramos gikan sa 36 ka buy-bust operation ug 30 ka ronda pinaagi sa search warrant nga napahigayon sa CPPO gumikan sa Limpyo Probinsya.
Kagahapon, ang mga chief investigator sa CPPO gibansaybansay ug gitudloan sa mga piskal sa lalawigan sa Kapitolyo bahin sa pag-andam og affidavit batok sa mga dinakpan aron molig-on ang mga kaso ug mataral sa hukmanan.
Si Provincial Board Member Ivy Durano-Meca, vice chair sa Cpadac, nagkanayon nga gikan sa Oktubre 2014 hangtod sa Hunyo ning tuiga, miabot na og P700,000 ang nahatag nga pahalipay sa Cpadac ngadto sa mga pulis gumikan sa malampusong operasyon batok sa gidili nga drugas.
Si Albotra ug Gillamac mipasigarbo nga gumikan sa ilang malampusong mga operasyon ang CPPO maoy nag-una sa adunay labing daghang mga operasyon ug kinadak-an nga nasakmit nga drugas sa rehiyon siyete.