MOABOT ngadto sa 164 ka mga bakwit gikan sa Mindanao hilabi na sa dakbayan sa Marawi ang nakabenepisyo sa “cash for work” nga programa sa Department of Social Welfare and Services (DSWD).
Kagahapon, gitunol na sa DSWD pinaagi sa Department of Social Welfare and Services (DSWS) sa Cebu City Government ang ilang suholan.
Si kanhi Konsehal Lea Ouano-Japson, pangulo sa DSWS nagkanayon nga gipatrabaho ang nahisgutang mga Muslim partikular didto sa dakbayan sa Mandaue bisan kon ang ilang mga paryente nagpuyo sa Cebu City sama sa pagpanlimpyo sa kadalanan ug uban pa.
Ang matag-usa kanila gipatrabaho sulod sa 10 ka adlaw diin giadlawan og tag P200 kon P2,000 sa kinatibuk-an.
Si Japson nagkanayon nga nga ang “Cash for Work” iya sa DSWS ug igo lang nga nag-facilitate ang City Government para mapadali ang paghatag sa ilang suholan aron ilang magamit sa ilang pang-adlaw-adlaw nga galastohan.
Matod pa ni Japson nga human sa distribution kagahapon, ang maong mga evacuee nanguli na ra usab ngadto sa ilang mga paryente nga maoy ilang temporaryong gisak-an dinhi sa siyudad. (PAC)