IPATAWAG sa hepe sa Talisay Police Station ang upat niya ka mga sakop nga gipasanginlang ug gidudahan nga maoy protector sa wanted nga si Jessie Largo.
Hinuon igo lang nga nangatawa ang maong mga pulis sa pasangil kay alang nila usa lang kini ka pagpang-harrass.
Una niini ang pamilya sa gipatay nga si John Ronli Calizar nakadawat og mensahe labot sa nahimutangan sa suspek nga si Largo ug kinsa ang amo niini.
Samtang gibutyag usab sa maong mensahe ang pangan sa mga pulis nga protector ni Largo hinungdan nga dili gayod kini madakpan.
Si Supt. Jason Villamater miingon nga nakadungong na usab siya sa maong mga pangan sa pulis nga gipasanginlan.
Hinungdan nga iya kining ipatawag aron pangutan-on ug makahatag usab sa ilang habig.
Hinuon giklaro ni Villamater nga iya usab kining klarohon ngadto sa Regional Intelligence Group kon tinuod ba usab ang maong mga pamasangil batok sa iyang mga sakop.
Giklaro ni Villamater nga dugay na ang maong mga pulis ug kining upat nga gipasanginlan pulos sakop sa operatives section.
Apan wala niya isalikway ang pagtuo nga pagpanggukod ug panimawos lang ang pasangil tungod kay naligsan sa iyang mga sakop.
Nanawagan si Supt. Villamater nga kon kinsa ang dunay mahibaw-an moderitso kini sa ilang buhatan ug dili sa social media. (DRT)