ANG pagpakig-sparring sa usa sa mga maayong laking boksidor sa tibuok kalibutan maoy makapataas sa moral sa batan-on ug gilantawng usa sa mga promising fighter sa nasod nga si Mark Magsayo sa Ala Boxing gym.

Ubos sa iyang makuting ensayo karon, perming ika-sparring ni Magsayon ang kanhi “Fighter of the Year” awardee nga si Nonito Donaire Jr.

Si Donaire anaa karon sa Cebu ug nag-training usab sa Ala gym sa Nasipit, Talamban alang sa iyang away batok sa Frenchman nga si Anthony Settoul karong Hulyo 18 didto sa Macau.

Gipili sa Donaire team nga si Magsayo maoy permi nilang ika-sparring.

“Si Magsayo ug Nonito maoy permi mag-sparring ug maayo ang ilang gipakita. Pulos sila impresibo sa training,” matod sa chief trainer sa Ala Gym nga si Edito Villamor.

Moabot na ngadto sa 30 ka rounds ang na-sparring ni Donaire ug Magsayo.

Ang 20-anyos ug wala pay pildi nga Magsayo nangandam usab alang sa iyang away karong Hulyo 11 isip usa sa supporting bout sa Pinoy Pride 31 sa Waterfront Hotel and Casino.

Iyang ikasinukliay sa kumo ang Mexicanong si Rafael Reyes alang sa bakatning International Boxing Federation (IBF) Youth featherweight strap.

“Makapataas ni sa moral ni Magsayo ug makadugang sab ni sa iyang eksperiyensiya. Makasugakod na gud siya ni Nonito. High level ang skills ni Nonito natural motaas sab ang level sa skills ni Magsayo,” dugang ni Villamor.

Si Magsayo adunay 10-0 nga baraha diin walo niini iyang gipang-knockout. Kini maoy una niyang pagpakigsangka og Mexicano ug una pa usab kini niyang title fight.

Giangkon ni Villamor nga wala pa gyud sila makakita sa estelo sa Mexicano bisan og sa video lang.

Ang 24 anyos nga Reyes naghupot usab og 16-4 nga baraha 12 ang gipang knockout niini.

Sa main event sa maong card, si Donnie “Ahas” Nietes modepensa sa iyang World Boxing Organization (WBO) light flyweight title batok sa Mexicanong si Francisco Rodriguez.