MAHIMO nang free agent si Kevin Love sugod karong Hulyo 1.
Kini human ang power forward sa Cleveland Cavaliers nakahukom nga di niya gamiton ang iyang katapusang tuig sa iyang kontrata.
Si Love kinsa og $16.7 million sa sunod season mipahibawo na kagahapon sa Cavaliers kalabot sa iyang desisyon.
Hinuon wa ikasurprisa ni David Griffin, general manager sa Cavaliers, ang maong desisyon sanglit sa niaging semana iya na daang napangagpasan nga si Love ug ang ilang superstar nga si LeBron James magpa free agents sa karong summer.
Apan nagtuo si Griffin nga mopirma ra gihapon og balik sa Cavs ang duha. Tinguha lang nila nga makapahimulos usab sila sa pagpasaka unya sa salary cap sa mga players tungod sa bag-ong kasabutan kalabot sa TV nga moepekto sa 2016-17 season.
Ang 26-anyos nga Love nakuha sa Cleveland sa niaging summer pinaagi sa trade gikan sa Minnesota.
Sa iyang pagka free agent, ang mga teams nga nagtinguha karon sa iyang serbisyo mao ang Boston Celtics, Los Angeles Lakers, Phoenix Suns ug Portland Trail Blazers. Pero ang Cavaliers maoy adunay first option ngadto ni Love.
Anaa na karon niya paghukom kon motapon ba siya og laing team o magpabilin sa Cleveland aron iyang ipadayon ang pagpangita sa titulo uban nila ni James ug sa All-Star guard nga si Kyrie Irving.
Apan mahimong mag-agad usab kini sa iyang injury nga molanat pa og taodtaod sa di pa siya hingpit nga maka-recover. Matod pa nga modagan ngadto sa unom ka buwan ang pagpaalim niini.
Si Love ug si James nagkauban sa 2013 Olympic team apan matod pa nga dili kaayo suod ang duha. Bisan pa man niini, sa ilang pagkauban og balik, maayo gihapon og dagan ang Cavaliers sa ilang kampanya.
Sa iyang bahin, si James subling namahayag nga magpabilin siya sa Cavaliers hangtod nga iya kining magiyahan sa ngadto sa unang major title sa professional sports sukad niadtong 1964.
“Being back home and back with my fans is everything that I dreamed of,” ingon niya. “Thank you for an incredible season. I’m not satisfied . I’m not happy with the way things turned out.”