NGILOHAN ko sa teaser sa hapit na ibalik nga “Pilipinas Got Talent” diin usa sa mga hurado si Robin Padilla.
Sa teaser, gipakita ang usa ka niaging eksena diin nitindog si Robin ug nisinggit nga ‘Muli nyong binuhay ang pagka Pilipino ko!’
Nganong ngilo? Tungod kay di man gud ni orihinal ni Robin niadtong hurado pa si Ai-ai delas Alas, daghang higayon nga nisinggit kinig ‘Muli nyong binuhay ang katawang lupa ko.’
Maayo unta tingali kon gilahi ni Robin ang iyang linya, kanang matawag nga iya gyud mismo.
u25cf ● ●
Panahon gyud karon sa mga batan-ong artista human nilang Julia Barretto ug Joshua Garcia, sila na sab si Maymay Entrata ug Edward Barber ang gisulayan kon unsa kakusog ang ilang love team.
Una nilang proyekto mao ang Loving In Tandem nga gisalida na karon sa mga sinehan sa tibuok nasud. Gawas nilang Maymay ug Edward, kauban usab nila si Kisses Delavin ug Marco Gallo.
Ma-imagine nako ang kasaba sulod sa sinehan inig syagit sa mga babaye ug mga gibati og kababaye inig gawas sa mga tisoy nga sila si Edward ug Marco.
Wala tingali mosinggit nga lalaking tumatan-aw inig gawas nilang Maymay ug Kisses uy.
Mangutana unya ko sa promo diva nga si Josie Pereyra unsa kakusog ang mga bag-ong loveteam nga masukod sa kita sa takilya.
u25cf ● ●
Gipakita na usab sa ABS-CBN ang ilang pagpangga sa usa nila ka talent human nabulabog ang career sa unang kampyon sa “Tawag ng Tanghalan” sa Showtime nga si Noven Belleza tungod sa kaso nga gisang-at batok niini, wa biyai sa Kapamilya Network ang mag-aawit nga taga Negros.
Gawas nga dunay bag-ong album si Noven gipa-guest pa gyud kini sa mga programa sa network ug gipakita ang maayong bahin sa pagkatawo sa mag-aawit.
Di na lang ta matingala nga malimtan sa dayon nga di pa kaayo dugay gidakop si Noven dinhi sa Cebu human kini mo-guest sa concert ni Vice Ganda.
u25cf ● ●
Human ni Bamboo, si John Arcilla na usab ang akong nasakpan nga nipakita sa iyang kamaayong moluto sa programang “Magandang Buhay”.
Isdang salmon ang giluto ni John, igo na lang kong naglaway samtang nagtan-aw nilang Karla Estrada, Jolina Magdangal ug Melai Cantiveros nga ganado kaayong nikaon sa linuto ni John nga ilang giparesan og kan-ong humay.