Super Suroy: Pabugnaw sa Buwakan ni Alejandra

ABI nimo og sama lang kini sa mga nitumaw nga flower garden sa kabukiran sa Sug­bo apan kon makita kini ni­mo gikan sa taas, diha ka ma­ka-appreciate sa kaanindot sa Buwakan ni Alejandra.

Mao kini ang lain na usab nga angay bisitahon sa publiko ilabi na sa mga mahiligon og picture.

Kon gikan ka sa dakbayan sa Sugbo maabot nimo ang Sitio Bunga, Barangay Gaas, lungsod sa Balamban sud sa 30 ngadto sa 45 minutos kon sa Central Highway ka moagi.

Mao kini ang labing unang barangay sa pagsud nimo sa Balamban ug anaa ra usab kini kilid sa dalan.

Alang sa mga di mahiligon sa buwak ug kon magtan-aw lang ka sa ubos sama ra kini og normal nga flower garden apan kon anaa kay drone, didto nimo makuha ug makita ang amazing nga landscaping niini.

Usa sa nakahuna-huna sa tourist site ang konsehal sa Barangay Gaas nga si Eleuterio Gentapa kinsa iya sa iyang asawa ang luna.

Si Gentapa kinsa chairman sa Committee on Tourism, nakahuna-huna nga magtukod og flower farm nga mamahimong usa ka tourist destination.

Anaa lang sa 700-800 metros kwardrado ang dapit apan plano kini nila nga palambuon.

Gawas sa hilig ni Gentapa sa mga buwak, usa sad sa nakapadani kaniya ang iyang ugangan nga inahan sa iyang asawa nga si Alejandra diin kaniadto pa ang hilig mokolekta og nagkadaiyang buwak.

Hulyo niadtong nakalabay nga tuig dihang giplanohan ang proyekto ug usa kini sa tulo ka mga farm nga gikatakda nga ilusad sa Gaas lakip niini ang Banana Farm ug Vegetable Farm.

Sapagkakaron, anaa pa sila sa ilang soft opening diin gisugdan kini pag-abli sa publiko, Mayo 8 ning tuiga.

Sa P50 alang sa dagko ug P20 alang sa 8-anyos paubos, mamahimo na mo nga maka-selfie ug groufie sa dapit.

Anaa nay kapin 200 ka species sa buwak ang farm apan kasamtangan nga wa pa kini nila butangi og pangan tungod kay padayon pa kini nila nga gisuta.

Awhag ni Gentapa sa publiko nga di unta mosud sa dapit nga way foot path aron di maguba ug matumban ang buwak.

Hinuon, perennial kini nga mga klase diin makita ra usab sa local hinungdan nga all year round kini.

Kahibawo ko nga nakabasa naka sa social media ani, apan mas maayo nga mabisita kini ni­mo ug makasinati sa maanin­dot nga lugar ug mabugnaw u­­sab nga Buwakan ni Alejandra.

Unsaon pag-adto?

Mokantidad og P120 ang plite sa V-hire nga imong sakyan paingon sa Buwakan ni Alejandra nga anaa nahimutang sa Barangay Gaas, Balamban nga maagi sa Transcentral Highway.

Pahinumdom:

1. Dili pwede manigarilyo sa dapit
2. Dili usab pwede manguha og buwak o bisan mopalit
3. Sunda ang foot path ug ayaw pugsa pagselfie nga mosulod na sa lugar
4. Bisita sa lugar alas 3:00 sa hapon ngadto sa alas 5:00
5. E-enjoy ang kalikopan ug ayaw kini gub-a

Open from 7:00 am to 5:00 pm