MIDANGOYNGOY nga nangayo og tabang ang pamilya sa usa ka sakop sa Philippine Coast Guard nga anaa nanimuyo sa probinsya sa Misamis Oriental.
Kini human migawas ug mikalat sa mga social networking sites ang video sa tulo ka tawo nga gituohang duha ka mga coast guard ug usa ka barangay kapitan nga nihangyo sa gobyerno nga matabangan sila nga mabuhian.
Ang sakop sa Philippine Coast Guard (PCG) gi-ilang sila si Seaman 1st Class Rod Allen Pagaling ug Seaman 2nd Class Gringo Villaruz, kinsa nadestino sa Aliguay Island, Zamboanga de Sur niadtong summer aron unta motabang sa pagpatuman sa kahapsay ug kalinaw sa dapit apan gidagit sa mokabat 15 ka armadong lalaki nga gituohang sakop sa Abu Sayaf Group (ASG).
Apil sa gidagit mao ang barangay kapitan sa Aliguay nga si Robert Bulagao.
Nasayran nga mokabat sa P3 milyones ang gipangayo sa matag ulo sa biktima.
Mibahad ang kidnaper sa pamilya sa usa sa mga biktima nga ilang putlan og ulo ang mga dinagit kung dili mahatag ang ilang milyones nga hangyo.
Pamahayag sa PCG-Northern Mindanao nga gihimo na nila ang mga negosasyon ug gihimo ang tanan nga luwas kining makabalik sa pamilya.