MOKABAT sa 167 ka giingong pushers, users, kawatan ug armado nga tawo ang nasikop sa Cebu City Police Office subay sa Oplan Pokemon nga kampanya niini.
Niabot usab sa P3.4 milyones nga kantidad sa shabu ang nasakmit diin aduna kini gibug-aton nga 297.42 gramos.
Samtang niabot usab sa 21 ka menor de edad ang naluwas sa kapulisan gikan sa kadalanan ug mga gang.
Lakip sa ilang nasakmit ang unom ka ilegal nga armas, 16 ka ilegal nga gambling machines, gambling paraphernalia ug kwarta nga P2,880.75 nga gituohang gikan sa ilegal.
Ang Oplan Pokemon, usa ka termino nga gimugna ni CCPO Director Joel Doria alang sa one-time, big-time nga operasyon batok krimen.
Samtang sa dakbayan sa Talisay, upat ka giingong pushers ang nadakpan sa usa ka buy-bust operation sa Sitio Uldog, Barangay Cansojong, alas 2:45 sa hapon niadtong Biyernes.
Ang nasikop mao sila si Odelio Hermosa, 27; Diving Grace Dandan, 19; Denver Segundino, 29; ug John Phillip Lope, 26.
Nasakmitan sila og 0.24 gramos sa shabu nga nagkantidad og P1,200 ug 32.2 gramos sa pinauga nga dahon sa marijuana nga nagkantidad og P96,600.
Si Hermosa maoy target sa operasyon ug gituohan nga kauban ang tulo nga nasikop.
Matod ni Supt. Jason Villameter nga bag-ong drug personalities ang nasikop.