KANHI treasurer sa kagamhanan sa lalawigan sa Sugbo hangtod karon napakyas pag-liquidate sa iyang cash advances nga nikabat og P26.4 milyones sukad niadtong 2010.
Si Provincial Accountant Ramon Dumayac Jr. nibutyag nga kalima ka sunodsunod nga higayon nga nag-cash advance si kanhi provincial treasurer Roy Salubre, kaupat sa Abril ug kausa sa Mayo niadtong 2010 gikan sa intelligence fund nga nisumada og P25 milyones.
Dugang P1.4 milyones ang wala usab niya ma-liquidate gikan sa panudlanan sa Kapitolyo.
Suma pa niini nga padad-an nila og demand letter si Salubre, kinsa gitaktak na sa serbisyo, apan wa sila makatultol sa address niini.
Base sa record nga gipakita ni Dumayac sa Superbalita Cebu, unang nag-cash advance ang kanhi opisyal sa Kapitolyo og P5 milyones niadtong Abril 16, gisundan og laing P5 milyones pagka Abril 23, ug P10 milyones pagka Abril 30.
Pagka Mayo 7, 2010, nag-cash advance na usab si Salubre og P5 milyones gikan sa intelligence funds.
Matod ni Dumayac nga giingnan siya ni Salubre nga naka-liquidate na kini sa Commission on Audit central office apan gibalik ug wala gitugot ang liquidation niini.
Si Dumayac nidugang nga basta intelligence fund ang liquidation direkta nga iduso ngadto sa ulohang buhatan sa COA.
Siya niangkon ang unliquidated cash advances ni Salubre maoy nakapadako sa unliquidated cash advances sa lalawigan nga nabantayan sa audit report sa COA sa miaging tuig nga niabot og P47.1 milyones.
Ang Provincial Accountant nahibung kon nganong gitugtan gihapon si Salubre nga makahimo og dugang cash advances nga wala pa kini maka-liquidate sa iyang unang nakuha niadtong Abril 16, 2010.
Kini hugot unta nga gidili ubos sa COA Circular 97-002.
Si Dumayac nidugang nga ubos sa maong circular sa COA, kinahanglan i-liquidate ang nakuha nga cash advance sa higayon makumpleto ug mapatuman na ang kalihokan o programa nga maoy katuyoan niini.
“Pananglitan dunay cash advances nga dili ma-liquidate there is a presumption of misappropriation of funds. Seguro, dunay nagamit sa personal mao nang maglisod sila og liquidate,” matod ni Dumayac labot sa pipila ka mga opisyal ug empleyado sa Kapitolyo nga napakyas pag-liquidate sa ilang cash advances. (SCG)