SUBAY niining pakigbatok sa mainstream media sa fake news sa online platform, matod sa Editor-In-Chief sa philstar.com nga si Anadel Camille Diola, di ang tigbuhatan og fake news ang kontra sa mainstream, apan ang publiko nga mobasa gihapon sa saktong impormasyon.
Si Diola usa sa dinapit nga tigpamaba atol sa forum kabahin sa “Journalism and Blogging in the Age of Fake News”, nga parte sa mga kalihukan sa nagpadayon nga ika-25 nga Cebu Press Freedom Week.
Lakip sa mga speaker sila si Jon Joaquin, editorial director sa mindation.com ug si Atty. Ethelbert Ouano, professor sa University of San Jose Recoletos (USJR) - School of Law.
Dugang ni Diola nga usik sa oras ang gihimo sa publiko, hilabi na kadtong anaa sa online nga mobasa pa sa di tinuod nga balita inay nga adto unta sa lihitimo nga media outfit.
“I don’t think they will beat us (mainstream media). I think there will be solutions like algorithim or Facebook will improve it’s tools to battle or combat them,” si Diola nagkanayon.
Si Joaquin, sa iyang bahin, niingon nga di na bag-o ang fake news, apan gidasig ang publiko hilabi na ang mga tinun-an o millenials nga di diha-diha mo-share ug like sa mga post sa social media.
Tambag usab ni Ouano nga kinahanglan nga i-verify usa kon fake news ug i-report kon mapamatud-an. “Do your research. Verify sources. Vet. Report fake news. Defend the truth.”
Ang forum gipangulohan sa The Freeman ug Banat News diin sponsor ang Primary Homes, Pizza Republic ug Montebello Villa Hotel. (HBL)