PADAYON ang pag­lapad sa coverage sa PhilHealth sa pagdugang niini og kategoriya sa membership alang sa senior citizens.

Ang mga senior citizens nga kasamtangan empleyado sa pribado o publiko nga sektor, co­vered niadto pa ilawom sa Formal Economy Program sa PhilHealth.

Kadtong mga retirado nga miyembro nga nakabayad na og di mo minos 120 ka buwan nga kontribusyon, covered usab sa PhilHealth bisan og wala na sila magbayad. Inig abot sa miyembro sa edad nga 60 anyos, unya wala na siya magtrabaho, mahimo na siya nga moparehistro ubos sa Lifetime Member Program sa PhilHealth.

Mao usab kini ang api­lan sa mga myembro ilawom sa Informal Economy Program sa PhilHealth inig’abot nila sa edad nga 60 anyos ug nakabayad na sila og bisan 120 lang ka buwan nga kontribusyon.

Kadtong senior citizens nga na apil sa listahanan sa Department of Social Welfare and Development (DSWD) dunay libreng health insu­rance ilawom sa Indigent Program sa PhilHealth, tungod kay giabaga sa Department of Health (DOH) ang ilang kontri­busyon. Ang uban, gi-sponsoran sa ilang lokal nga pangagamhanan ilawom sa Sponsored Program sa PhilHealth.

Sa pagpasar sa balaod nga nagmando nga hatagan gayud og PhilHealth coverage ang tanan nga mga senior citizens (Republic Act 10645), kadtong mga senior nga wala pa ma-myembro sa PhilHealth, pwede na karon makaparehistro ilawom sa bago nga Senior Citizen Program. Dili magbayad og kontribusyon ang mga senior nga ma-myembro ilawom niini nga programa, tungod kay ang DOH usab ang mi-sponsor sa ilang kontribusyon.

Giawhag ang tanan nga mga senior citizens nga wala pa makaparehistro sa PhilHealth, sa pagpakig’koordinar sa ilang tagsa-tagsa ka Office for Senior Citizens' Affairs (OSCA).

Gipahimangoan usab sila sa pagbantay sa mga fixers. Wala’y processing fee o lain pa nga bayaran ang usa ka senior citizen nga magparehistro sa PhilHealth.

Ang porma sa pagparehistro ug ang ilang senior citizen ID o bisan usang valid ID nga duna’y adlaw nga natawhan ang isumiter. (PR)