GIMAHAYAN si kanhi kongresista Ne­rissa Soon-Ruiz nga unang gibuwag sa sixto ang Lapu-lapu nga angay unta unang ma-lone district ang Mandaue. Sila si Rep. Luigi Quisumbing ug Mayor Jonas Cortes uyon nga himoong mag-inusarang distrito ang Mandaue. Kon mahinayon mailong tuwapos ang Cordova ug Consolacion. Si Board Member Thadeo Ouano misugyot nga ang habagatang barangays sa Mandaue ug Cordova usa ka distrito ug amihanang barangays ug Consolacion lain usab nga distrito. Dunay sugyot nga ang Consolacion isakop sa kinto distrito samtang ang Cordova isakop sa dakbayan sa Sugbo pahaom sa plano nga upaton ka bahin nga mao ang east ug west dugang sa south ug north district. Dugang distrito nagpa­sabot nga dugang gahin sa nasodnong mga ahensya sa gobyerno bisan gipapas na ang pork barrel. Gibanhaw usab ni Rep. Wilfredo Caminero ang balaodnon ni kanhi Rep. Pablo Garcia nga pikason sa duha ka distrito ang segundo nga 15 ka mga lungsod nga gilibotan sa 284 ka barangays. Mag-uban ang Ronda, Dumanjug, Moalboal, Alcantara, Alegria, Badian, Ginatilan ug Malabuyoc. Lain sab nga distrito ang Samboan, Santander, Oslob, Boljoon, Alcoy, Dalaguete ug Argao.

* * *

Nagtinguha si Rep. Aileen Radaza nga mahimong lain nga probinsya ang Lapu-lapu nga dunay 30 ka barangays nga isakop ang Cordova nga dunay 13 ka barangays.

Makahupot na unya og posisyon kadtong modagag gobernador dugang sa kongresista ug mayor. Maayong pagkasulti apan bati nga paminawon kay mabuak man ang Sugbo.

Kahinomdoman gisupak kadtong balaodnon nga Sugbuak nga himoong upat ka probinsya kay hinakog, giwalis ang espirito sa panaghiusa, giwakli ang kultura sa pagtinabangay, giwagtang ang tigbayon sa pakigsandurot ug nagpapas sa namat-an nga kasaysayan. Apan alang kang Cordova Mayor Adelino Sitoy angayan nga pandayon ang tulo ka balaodnon. Himoong distrito ang Mandaue itakin ang Consolacion, probinsya ang Mactan lakip na ang Cordova ug himoong lungsod ang isla sa Olango. Dili Sugbuak kondili Sugdugang. Niining paagiha ang mga kaso sa Cordova dili na husayon sa Mandaue kondili anha na sa Lapu-Lapu.

Tabuelan

Anaa ang tubig samtang dili pa mahubsan ang tinubdan. Bagtik ug Gumbang spring maoy naghatod og tubig sa Tabuelan. Bagtik sakop sa San Remegio ug ang Gumbang sa Bongon usa sa 12 ka barangays sa Tabuelan. Magpiyesta sa Hunyo 24 sa patron San Juan sa ilang Ani-anihan festival. Ubos sa hurisdiksyon sa Tuburan kaniadto, “taboy lang” buot ipasabot nga tabok lang kay lugot ug sapa-sapa ang agianan. Atong sayran nga sa Hunyo 24 mangaligo paghugas sa sala ug nagsimbolo sa pagbunyag ni San Juan. Hunyo 29 laing okasyon sa pangaligo nga mao ang San Pablo ug San Pedro.

(csa_1156@yahoo.com/0905-250-4643)