GIHULAGWAY sa usa ka editor sa usa ka website nga hagit sa press freedom ang paggamit sa mga pulitiko sa fake news aron mawagtangan og bili ang katakos sa mga tigbalita o journalists.
Matod ni Iain Martin, Asia Editor sa Storyful, nga usa ka hulga ang fake news sa mga tigbalita hilabi na og ang gobyerno na ang nigamit niini.
Si Martin mao ang dinapit nga speaker atol sa ika-11 nga Reaching Out to Future Journalists Forum kagahapon diin naghisgot kini kabahin sa “Tools to ferret out hoaxes and misinformation.”
Dugang niya nga aduna’y nagkadaiyang klase sa mga sayop nga impormasyon.
Lakip niini ang false connection, fake context, manipulated context, satire or parody, misleading content, imposter content, ug fabricated content.
Gihulagway usab niini nga mas dali mailhan ang usa ka website nga fake itandi sa social media accounts.
Gawas niini, nitambag usab kini sa mga tinun-an sa Communications sa nagkadaiyang tunghaan sa Sugbo nga tan-awon ang mga importante nga butang aron pagsuta sa fake news.
Usa niini mao ang paggamit og daan nga hulagway o video, lokasyon niini, petsa ug source.
Si Atty. Jane Paredes, head sa Public Affairs - VisMin sa Smart Communications kinsa usa sa reactors, nagkanayon nga, “If you share fake news, you are helping propagate false hope.”
Samtang si Nini Cabaero, editor-in-chief sa SunStar Network Exchange, nagkanayon nga, “Fake news is news. We (journalists) write about it.”
Ang SunStar Cebu ug Superbalita Cebu mao ang nangulo sa maong forum inubanan sa sponsor niini nga AirAsia, Smart ug White Gold Club diin subay gihapon sa kalihokan sa 25th Cebu Press Freedom Week.