HANGTOD karon nagpadayon diay gihapon ang illegal nga pagpangubkob sa mga bas ug graba diha sa sapa sa Mananga, Tabunok, dakbayan sa Talisay.

Sa niaging semana, ang Sun.Star Superbalita na mismo ang nakasaksi niini.

Bisan og aduna na untay solusyon sa maong problema, apan ang kakuwang sa implementasyon niini maoy hinungdan nga wa gihapon masugpo ang mga illegal nga mangubkobay sa nahisgutang sapa.

Kini maoy makapahibulong kon nganong nagpadayon man kining illegal nga binuhatan nga unta aduna may executive order nga nagporma og Mananga Task Force nga maoy gitahasan sa pagprotehir sa maong sapa. Hain na man diay ni sila?

Tungod niini, sa miaging buwan, ang konseho sa maong siyudad nag-awhag ni Cebu Governor Hilario Davide III nga mosusi kon nganong napakyas si Mayor Johnny V. delos Reyes sa pagpakgang niini.

Gisaysay ni Konsehal Danny Caballero sa iyang resolution nga sulod sa duha ka tuig adunay pundo nga gigahin alang sa Mananga Task Force apan, matod pa, way nakita nga nanrabaho.

Base sa resolution ni Caballero, sa niaging tuig, aduna kini budget nga P4.5 million ug P1.3 million nga supplemental budget sa 2013.

Apan alang ni delos Reyes wa na kinahanglana ang Capitol ug bisan gani ang mga tinugyanan sa balaod kalabot niini tungod kay mahimo ra kini sa dakbayan.

Ingon niya nga iya nang gitahasan ang iyang Flying Squad aron kini mapakgang.

Pero nagpadayon pa man lagi gihapon, Mr. Ma­yor? Di kaha kunsabo ra pod ang imong Flying Squad sa illegal haulers? Just asking.