SEVILLA, Bohol - Mitahan sa iyang kaugalingon ang suspek nga trabahante sa konstraksyon ngadto sa kapulisan human iyang gidunggab sa usa ka mag-uuma niadtong Hunyo 21 sa gabii duol sa panimalay sa gituhoang suspek sa may Barangay Tagustusan, Balilihan, Bohol.
Giila ang biktima nga si Redem Biongcog, 34, ulitawo ug usa ka mag-uuma nga residente sa Barangay Tagustusan, Balilihan, Bohol samtang ang gituhoang suspek giila usab nga si Patricio Tahil, 47, ulitawo ug usa ka trabahante sa usa ka konstraksyon nga kompanya nga residente ra usab sa nahisgutang lugar.
Sa pakisusi sa kapulisan, ang biktima maoy nanguna sa panagbangi dihang gisuwayan kini og padasmag sa motor sa biktima ang suspek samtang kini galakaw pauli sa ilang panimalay og maayo nalang kay nakalikaw kini.
Wa makontento ang biktima iya pang gisumbag ang suspek sa makaduhanang higayon.
Matod pa, igo lang nga mibawos ang suspek ngadto sa biktima hinungdan nga iya kining gitigbas usa ka mahait nga sundang nga adunay sukod nga 21 ka pulgada.
Maayo nalang kay nakadagan ang biktima ug nadala kinig dali sa tambalanan ug anaa na karon sa luwas nga kahimtang.
Nakaangkon og samad tinigbasan ang biktima sa may liog nga bahin niini.
Nasayran usab nga aduna nay daan nga gikabingkilan ang suspek ug biktima.
Gitahan usab sa suspek ang sundang nga iyang gigamit sa pagtigbas sa biktima.
Kasamtangan naa pa sa prisohan ang suspek.